QR Code

وزیراعظم دورہ ملتان کے موقع پر الگ صوبہ کا اعلان کریں، سیکرٹریٹ کا لولی پاپ قوم کو دینا بند کیا جائے، ڈاکٹر صفدر ہاشمی 

26 Apr 2021 02:49

جماعت اسلامی ملتان کے امیر نے وزیراعظم کے دورہ ملتان پر تنقید کرتے ہوئے کہا کہ ملتان کو اس کی آبادی کی حیثیت سے فنڈز دیئے اور خرچ کئے جائیں، سیوریج، واسا کے مسائل کے حل کے لیے کوئی اقدامات نظر نہیں آرہے، صحت کے شعبہ کو نظر انداز کرنا نقصان دہ ہوگا۔

اسلام ٹائمز۔ امیر جماعت اسلامی ملتان ڈاکٹر صفدر ہاشمی نے کہا ہے کہ شہر کی تعمیر و ترقی کے لیے پیکج صرف اعلان تک محدود نہیں رہنا چاہیے، فنڈز کی فراہمی اور ان کا استعمال اس وقت شہر کی ضرورت ہے، شہر میں مسائل بے پناہ ہیں جن کے ازالہ کے لیے چند ارب کا پیکیج کوئی معنی نہیں رکھتا۔ انہوں نے کہا کہ جنوبی پنجاب کو صوبہ بنانے کا اعلان وقت کی ضرورت ہے جس کے وعدہ خود عمران خان نے کیا۔ شہر کے بازار سیوریج کے گندے پانی سے بھرے ہوئے ہیں جس سے تاجر اور عوام دونوں پریشان ہیں، سیوریج کا نیا سسٹم بچھانا وقت کی ضرورت ہے۔ انہوں نے کہا کہ افسوس کی بات ہے کہ نشتر ہسپتال میں مریضوں کے علاج کے لیے زکوۃ مانگی جارہی ہے، صحت کی سہولیات فراہم کرنا حکومت کی ذمہ داری ہے نشتر ہسپتال ایسا ادارہ ہے جو بلوچستان اور کے پی تک کے مریضوں کو سہولت فراہم کرتا ہے مگر افسوس کہ اس ہسپتال کے لیے فنڈز میں کوئی اضافہ نہیں۔ ڈاکٹر صفدر ہاشمی نے کہا کہ شہر ملتان کی تعمیر و ترقی وقت کی ضرورت ہے۔

خبر کا کوڈ: 929244