QR Code

حضرت علی علیہ السلام کا یوم شہادت دنیا بھر میں انتہائی عقیدت واحترام سے منایا جائے گا

21 Aug 2011 20:47

اسلام ٹائمز:ملک بھر میں سکیورٹی کا ہائی الرٹ ہو گا، انتظامیہ نے تمام تیاریاں مکمل کرلیں، لاہور میں جلو س عزا کے روٹ پر پولیس کا فلیگ مارچ، یوم شہادت علی علیہ السلام کے موقع پر تمام امدادی ٹیموں فائر بریگیڈ، بم ڈسپوزل سکواڈ اور ہسپتالوں کو بھی الرٹ کر دیا گیا ہے، جلوس کے ہمراہ سینکڑوں پولیس اہلکار اور مختلف محکموں اور تنظیموں کی طبی ٹیمیں ہوں گی

لاہور:اسلام ٹائمز۔ پیر کے روز پاکستان سمیت دنیا بھرمیں امام المتقین حضرت علی علیہ السلام کا یوم شہادت انتہائی عقیدت واحترام سے منایا جائے گا، اس موقع پر سکیورٹی کا ہائی الرٹ ہو گا اور امدادی ٹیمیں مستعد ہوں گی، انتظامیہ نے اس ضمن میں تمام تیاریاں مکمل کرلی ہیں۔ صوبائی دارالحکومت میں یوم شہادت علی علیہ السلام کے سلسلے میں شبیہ تابوت کا مرکزی جلوس صبح 9 بجے مبارک لال حویلی اندرون موچی گیٹ سے برآمد ہو گا جو اپنے مقررہ راستوں سے گزرتا ہوا شام 7 بجے بیرون بھاٹی گیٹ کربلا گامے شاہ پر پہنچ کر اختتام پذیر ہوگا، اس حوالے سے سکیورٹی کے انتہائی سخت انتظامات کئے گئے ہیں تمام عزا داروں کو واک تھرو گیٹ اور چیکنگ کے دوسرے طریقوں کو جلوس میں شامل کیا جائے گا۔
پولیس نے جلوس کے راستے میں فلیگ مارچ کیا جس میں سینکڑوں اہلکاروں نے شرکت کی، دریں اثناء ڈی سی او لاہور احد چیمہ نے ایس پی سٹی، ایس پی سکیورٹی اور دیگر اعلیٰ آفیسرز کے ہمراہ جلوس کے مرکزی راستوں کا معائنہ کیا، مزید برآں شہر میں یوم شہادت علی علیہ السلام کے موقع پر تمام امدادی ٹیموں فائر بریگیڈ، بم ڈسپوزل سکواڈ اور ہسپتالوں کو بھی الرٹ کردیا گیا ہے، جلوس کے ہمراہ سینکڑوں پولیس اہلکار اور مختلف محکموں اور تنظیموں کی طبی ٹیمیں ہوں گی۔
جلوس میں کسی بھی ناگہانی صورت حال سے نمٹنے کیلئے خفیہ اداروں کے اہلکاروں کی بھی ڈیوٹیاں لگا دی گئی ہیں، یاد رہے کہ پنجاب حکومت کے حوالے سے یہ کہا جاتا ہے کہ ان کے دہشت گردوں سے تعلقات ہیں، شیعہ قائدین نے حکومت کو واضح انداز میں متنبہ کیا ہے کہ اگر یوم علی علیہ السلام پر کوئی سانحہ پیش آیا تو اس کی تمام تر ذمہ داری پنجاب حکومت پر عائد ہو گی۔

خبر کا کوڈ: 93591