QR Code
غزہ کیخلاف صیہونی جنگ میں 10 ہزار شہری بے گھر ہوئے ہیں، فلسطینی وزیر
4 Jun 2021 17:54
خبرنگاروں کیساتھ گفتگو میں فلسطینی وزیر برائے محنت و آبادکاری نے اعلان کیا ہے کہ بے گھر ہونیوالے 10 ہزار شہریوں میں سے 2 ہزار افراد کو ہنوز چھت میسر نہیں۔
اسلام ٹائمز۔ فلسطینی وزیر محنت و آبادکاری ناجی سرحان نے میڈیا کے ساتھ گفتگو میں اعلان کیا ہے کہ غاصب صیہونی رژیم کی جانب سے غزہ پر مسلط کردہ 12 روزہ جنگ میں 1 ہزار 200 فلسطینی گھر مکمل طور پر تباہ ہوئے ہیں جبکہ 1000 دوسرے گھروں کو بھی اس قدر نقصان پہنچا ہے کہ اب وہ رہائش کے قابل نہیں رہے۔ ناجی سرحان کا کہنا تھا کہ علاوہ ازیں دوسرے 20 ہزار گھروں کو بھی جزوی طور پر نقصان پہنچا ہے جبکہ صرف گھروں کی تعمیر نو کے حوالے سے لگایا جانے والا تخمینہ ہی 15 کروڑ ڈالر کے لگ بھگ ہے درحالیکہ بے گھر ہونے والے 10 ہزار شہریوں میں سے 2 ہزار افراد کو ہنوز چھت میسر نہیں۔ عرب اخبار رأی الیوم کے مطابق فلسطینی حکومت کی جانب سے صیہونی جنگ میں مکمل طور پر تباہ ہونے والے گھروں کے مالکین کو 2 ہزار جبکہ جزوی طور پر تباہ ہوئے والے گھروں کے مالکین کو 1 ہزار ڈالر کی امداد دی جا رہی ہے درحالیکہ 6 انجینئروں پر مشتمل ایک مصری ٹیم نے تعمیر نو کے لئے بدھ کے روز غزہ کی پٹی کا دورہ بھی کیا تھا۔
خبر کا کوڈ: 936257