اسلام ٹائمز - عمران خان لاہور پہنچ گئے

وزیراعلیٰ پنجاب عثمان بزدار نے ایئرپورٹ پر ان کا استقبال کیا۔ عمران خان رکھ جھوک روانہ ہوں گے جہاں وہ پاکستان کے پہلے اسمارٹ جنگل کا افتتاح کریں گے۔

اسلام ٹائمز۔ وزیر اعظم عمران خان ایک روزہ دورے پر لاہور پہنچ گئے، وزیراعلیٰ پنجاب عثمان بزدار نے ایئرپورٹ پر ان کا استقبال کیا۔ لاہور آمد کے بعد وزیراعظم ہیلی کاپٹر کے ذریعے رکھ جھوک روانہ ہوں گے جہاں وہ پاکستان کے پہلے اسمارٹ جنگل کا افتتاح کریں گے، یہ جنگل ماحولیاتی آلودگی پر قابو پانے کے لئے 24 سو کنال اراضی پر لگایا جا رہا ہے۔ واضح رہے کہ وزیراعظم عمران خان ایک روزہ دورے میں گورنر چوہدری محمد سرور اور وزیر اعلیٰ پنجاب عثمان بزدار سےملاقاتیں کریں گے، وہ اسمارٹ فاریسٹ کا افتتاح کرنے کے علاوہ تعلیمی انقلاب کنونشن سے خطاب بھی کریں گے۔ گورنرہاؤس میں گورنر اور وزیر اعلیٰ ان سے الگ الگ ملاقاتیں کریں گے،وزیر اعلیٰ سانحہ گریٹر اقبال پارک کے بارے میں رپورٹ دینے کے علاوہ صوبے کے انتظامی اور سیاسی امور پر بریفنگ دیں گے۔ گورنر پنجاب آب پاک اتھارٹی کے حوالے سے پیش رفت پر بریف کریں گے، جبکہ صوبائی وزیر صحت ڈاکٹر یاسمین راشد، وزیر کھیل تیمور خان بھٹی، صوبائی وزیر قانون راجا بشارت بھی وزیر اعظم سے ملاقا ت کریں گے۔