QR Code

زلزلہ متاثرین کو رضاکارانہ سروسز دے رہے ہیں، ینگ ڈاکٹرز ایسوسی ایشن

7 Oct 2021 20:05

اپنے ایک بیان میں وائی ڈی اے کے صوبائی صدر کا کہنا تھا کہ ایم آر آئی مشین کی عدم دستیابی کیوجہ سے متاثرہ مریضوں کے علاج میں تاخیر ہوگی۔

اسلام ٹائمز۔ ینگ ڈاکٹرز ایسوسی ایشن بلوچستان کے صوبائی صدر ڈاکٹر احمد عباس نے اپنے ایک بیان میں کہا ہے کہ ینگ ڈاکٹرز ایسوسی ایشن بلوچستان کی صوبائی کابینہ اور وائی ڈی اے سپریم کونسل کے ممبرز صوبے کے واحد ٹراما اینڈ ایمرجنسی سینٹر میں زلزلہ متاثرین کو علاج معالجہ کی غرض سے رضاکارانہ طور پر سروسز دے رہے ہیں۔ انہوں نے صوبے کے سب سے بڑے سرکاری ہسپتال میں ایم آر آئی مشین کی غیر دستیابی پر حکومت وقت کو تنقید کا نشانہ بناتے ہوئے کہا ہے کہ یہ ہماری بدقسمتی اور بدنصیبی ہے کہ دور جدید میں اس ملک کے بدنصیب ترین صوبے میں ایم آر آئی مشین موجود نہیں، جو کرپٹ حکمرانوں کی بدعنوانی کی تصویر پیش کرتی ہے۔ زلزلہ متاثرین میں سے اکثر مریضوں کی ریڑھ کی ہڈی اور دماغ کو چھوٹ پہنچا ہے، مگر اس کی تشخیص سندیمن پراونشل ہسپتال کوئٹہ میں ایم آر آئی مشین کے نہ ہونے کی وجہ سے ممکن نہیں ہے۔ جو متاثرہ مریضوں کے علاج میں تاخیر کا سبب بنے گا۔
 
صدر وائی ڈی اے کا کہنا تھا کہ گزشتہ کئی سال سے وائی ڈی اے بلوچستان اس بات کی ڈیمانڈ کر رہی ہے کہ ایس پی ایچ کوئٹہ میں ایم آر آئی مشین کی دستیابی یقینی بنائی جائے مگر کرپٹ حکمرانوں کو ہوش نہ آیا۔ ان کی اس بے حسی کا خمیازہ آج غریب عوام کو بگتنا پڑ رہا ہے۔ انہوں نے بتایا کہ سرکاری ہسپتالوں میں انہی سہولیات کی عدم دستیابی کے خلاف وائی ڈی اے بلوچستان سراپا احتجاج ہے۔ ان کے مطابق سرکاری ہسپتالوں کی نجکاری کا حکومتی ارادہ چکنا چور ہونے تک اور ہسپتالوں میں سہولیات کی فراہمی تک وائی ڈی اے بلوچستان چین سے نہیں بیٹھے گی۔

خبر کا کوڈ: 957660