QR Code

جنین، فلسطینی گاڑی پر غاصب صیہونیوں کی اندھادھند فائرنگ، 1 فلسطینی شہید

22 Dec 2021 10:03

گذشتہ شب فلسطینی شہر جنین میں غاصب صیہونی فوجیوں نے ایک فلسطینی گاڑی پر اندھادھند فائرنگ کر کے 1 فسلطینی شہری کو شہید کر دیا اور دعوی کیا ہے کہ وہ غاصب صیہونی فوجیوں کو اپنی گاڑی تلے کچل کر ہلاک کر دینا چاہتا تھا

اسلام ٹائمز۔ غاصب صیہونی فوجیوں نے فسلطینی شہر جنین میں اندھادھند فائرنگ کر کے مزید 1 فلسطینی جوان کو شہید کر دیا ہے۔ فلسطینی خبررساں ایجنسی شہاب کے مطابق وقوعہ شہر جنین کی دوتان نامی چیک پوسٹ کے قریب پیش آیا جبکہ اس دوران کوئی صیہونی فوجی زخمی یا ہلاک نہیں ہوا۔ شہاب نے لکھا ہے کہ غاصب صیہونی رژیم کے ترجمان ایویخائی ادرعی کا دعوی ہے کہ وقوعے میں شہید ہونے والا فلسطینی شہری اپنی گاڑی کے ذریعے غاصب صیہونی فوجیوں کو کچل دینا چاہتا تھا تاہم موثق فلسطینی ذرائع نے تاحال اس دعوے کی تصدیق نہیں کی۔ دوسری جانب متعدد عالمی خبررساں ایجنسیوں کی جانب سے یہ تصویر شائع کرتے ہوئے خبر دی گئی ہے کہ جائے وقوعہ پر 2 گاڑیاں جلتی پائی گئی ہیں کہ جن میں سے ایک ممکنہ طور پر حملہ آور فلسطینی شہری اور دوسری غاصب صیہونی فوجیوں سے متعلق ہو سکتی ہے تاہم مصدقہ فلسطینی ذرائع نے اس وقوعے کی تصدیق کی ہے اور نہ ہی اس وقوعے سے متعلق مزید تفصیلات تاحال موصول ہوئی ہیں۔

خبر کا کوڈ: 969686