اسلام ٹائمز - تمام تشیع قیادت ایک پیج پر ہے، علامہ صابر عباس توحیدی کا خصوصی انٹرویو

تمام تشیع قیادت ایک پیج پر ہے، علامہ صابر عباس توحیدی کا خصوصی انٹرویو

اسلام ٹائمز کیساتھ خصوصی گفتگو کرتے ہوئے معروف خطیب، مبلغ اور مدرسۃ القائم کے پرنسپل علامہ صابر عباس توحیدی کا کہنا تھا کہ عوام کو چاہیئے کہ غیر ذمہ دار عناصر کی منبر حسینی تک رسائی کی راہیں مسدود کریں، محرم الحرام نہایت پرامن طریقے سے جاری تھا کہ ایک غیر ذمہ دار شخص کے بیان سے ایک مکتب فکر کی دل آزاری ہوئی اور اسکے بعد امن اور وحدت کی فضا یکسر بدل گئی، اہل تشیع اور اہل سنت دونوں جانب سے ایسے غیر ذمہ دار افراد موجود ہیں، جو مسلکی وحدت کو نقصان پہنچاتے ہیں۔

مسلکی تناظر میں پاکستان کی اندرونی فضاء ان دنوں کافی مکدر ہے، عوامی سطح پر موجودہ صورتحال کا ذمہ دار کسی حد تک سٹیج اور منبر کو بھی قرار دیا جا رہا ہے۔ دوسری جانب پاکستان میں اہل تشیع مسلک کو مختلف عناوین سے مسائل درپیش ہیں اور ان مسائل کے حل کیلئے کوئی سنجیدہ کوششیں بھی دکھائی نہیں دیتیں۔ مسالک کے مابین ہم آہنگی اور سٹیج و منبر کے کردار کے عنوان سے اسلام ٹائمز نے علامہ صابر عباس توحیدی سے گفتگو کی ہے، جو کہ انٹرویو کی صورت میں پیش ہے۔ علامہ صابر عباس توحیدی مدرسۃ القائم پنڈی بھٹیاں کے پرنسپل اور معروف خطیب ہیں۔ اپنے انٹرویو میں علامہ صابر عباس توحیدی نے بتایا ہے کہ پاکستان میں تشیع قیادت بہترین انداز میں اپنی ذمہ داریاں ادا کر رہی ہے، عوام کو بھی چاہیئے کہ اپنی قیادت پر مکمل اعتماد رکھے اور ان سے رہنمائی حاصل کرے۔ غیر ذمہ دار عناصر کو سٹیج حسینی سے دور رکھے اور عقائد کے سلسلے میں علماء کرام سے رہنمائی حاصل کرے۔ ایک سوال کے جواب میں ان کا یہ بھی کہنا تھا کہ آج تک کسی تشیع مدرسے میں کوئی غیر اخلاقی واقعہ پیش نہیں آیا۔ انہوں نے بتایا کہ تشیع قیادت ایک صفحہ پر ہے اور اگر کہیں کوئی اختلاف رائے ہے بھی سہی تو وہ حیثیت و اہمیت میں کم درجے پر ہے۔ قارئین محترم آپ اس ویڈیو سمیت بہت سی دیگر اہم ویڈیوز کو اسلام ٹائمز کے یوٹیوب چینل کے درج ذیل لنک پر بھی دیکھ اور سن سکتے ہیں۔(ادارہ)
https://www.youtube.com/channel/UCnodHW8xrEdtL-iNo9nrjhQ