نامزد گورنر بلوچستان جعفر مندوخیل کی تقریب حلف برداری کل منعقد ہوگی

اسلام ٹائمز۔ بلوچستان کے نامزد گورنر شیخ جعفر مندوخیل کل صوبائی دارالحکومت کوئٹہ میں اپنے عہدے کا حلف اٹھائیں گے۔ ترجمان گورنر ہاؤس بلوچستان کے مطابق کل 6 مئی کو گورنر ہاؤس کوئٹہ میں نئے گورنر کی تقریب حلف برداری ہوگی۔ جس میں نامزد گورنر بلوچستان شیخ جعفر مندوخیل اپنے عہدے کا حلف اٹھائیں گے۔ چیف جسٹس بلوچستان ہائی کورٹ جسٹس ہاشم کاکڑ نئے گورنر سے حلف لیں گے۔ جبکہ وزیراعلیٰ بلوچستان، اراکین اسمبلی اور دیگر سیاسی شخصیات بھی اس موقع پر شرکت کریں گے۔