ہمیں وطن عزیز پاکستان میں ظلم کا نظام قبول نہیں، علامہ مقصود ڈومکی

اسلام ٹائمز۔ مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ جمہوری ملک میں عوام کی آواز سنی جاتی ہے۔ ہمارے حکمرانوں کو مسائل کے حل میں کوئی دلچسپی نہیں ہے۔ بارڈر کے قریب مقیم افراد کا روزگار تجارت ہے۔ حکومت روزگار فراہم کرنے کی بجائے روزگار چھین رہی ہے۔ ان خیالات کا اظہار ایم ڈبلیو ایم کے مرکزی رہنماء نے بلوچستان کے شہر چمن میں چمن پرلت (دھرنے) کے شرکاء سے خطاب کرتے ہوئے کیا۔ گذشتہ 7 مہینے سے اپنے مطالبات کے حق میں عوام دھرنا جاری رکھے ہوئے ہیں۔ علامہ مقصود ڈومکی نے کہا کہ جمہوری ملک میں جمہور کی آواز کو سنا جاتا ہے مگر اس نام نہاد جمہوری دور میں عوام کی فریاد سننے والا کوئی نہیں۔ عوام کے مسائل اور مشکلات سے بے نیاز حکمرانوں کو عوامی مسائل حل کرنے سے کوئی دلچسپی نہیں ہے۔

ایم ڈبلیو ایم رہنماء علامہ مقصود ڈومکی نے کہا کہ حضرت امیر المومنین علی ابن ابی طالب علیہ السلام فرماتے ہیں کہ حکومت کفر سے چل سکتی ہے ظلم سے نہیں۔ ہمیں وطن عزیز پاکستان میں ظلم کا نظام قبول نہیں۔ ہم ہر مظلوم کے حامی اور ظالم کے دشمن ہیں۔ مجلس وحدت مسلمین اور ہمارے قائد علامہ راجہ ناصر عباس جعفری پاکستان کے مظلوموں کی آواز ہیں۔ انہوں نے کہا کہ ورلڈ بینک کی رپورٹ کے مطابق ملک کی 40 فیصد آبادی خط غربت سے نیچے زندگی گزار رہی ہے۔ یعنی دس کروڑ سے زائد شہریوں کے پاس کھانے کے لئے روٹی ہے اور نہ ہی پہننے کے لئے کپڑے ہیں۔ لوگ غربت و افلاس اور بے روزگار ی سے پریشان ہیں۔ حکومت لوگوں کو روزگار دینے کی بجائے ان سے روزگار چھین رہی ہے۔ بارڈر کے لوگوں کا روزگار تجارت ہے۔ جس پر پابندیوں کے باعث لوگ پریشان اور سراپا احتجاج ہیں۔