“Biz istər Amerikada Bostonda, istər Pakistan, Əfqanıstan, İraq və Suriyada günahsız insanların qətliamını məhkum edirik”

Həzrət Ayətullah Xamenei çərşənbə günü günorta ordu günü ordu komandanları, məsullar, bəsic qərərgah rəisləri, eləcə də hərbçi ailələri ilə görüşdə İran İslam Respublikasının ordusunu xalqın iftixarı, eləcə də sınaqdan keçmiş, etiqadlı bir ordu adlandırdı. Böyük rəhbər öz çıxışında Amerikanın yanlış siyasətlərini tənqid edərək buyurdu: “Bu gün Qərb mədəniyyəti yanlışlıqlar, məntiqsizliklər, zor və etinasızlıqla süquta uğramaq üzrədir.”
 
Silahlı qüvvələrin komandanı bu görüşdə İran İslam Respublikası ordusunun fərqli xüsusiyyətini yada salaraq buyurdu: “Bu gün İran İslam Respublikası quruluşu, onun ordusu öz gücünə görə yox, fədakarlıq və mücahidələrinə görə xalq tərəfindən sevilir.”
 
Həzrət Ayətullah Xamenei ordunun mütərəqqi bir ordu olduğunu vurğuladı: “Silahlı qüvvələrimizdə tərəqqi, elmi potensialın artması, müdafiə sənayesinin inkişafı, elektron sistemlərin tətbiqi heyrətamiz bir səviyyədədir. Bugünki ordunu qədimki ordu ilə müqayisə etmək olmaz.”
 
Cənab rəhbər sözünün davamında buyurdu: “Bütün bu uğurlar elə bir vəziyyətdə əldə olunub ki, İran xalqının düşmənləri ən kiçik fürsətlərdən istifadə edərək təxribat törədiblər, amma bütün bu mənfi fəaliyyətlər İran gənclərinin daxili istedadları sayəsində puça çıxarılıb.”
 
Cənab rəhbər İran İslam Respublikası ordusunun dini, etiqadlı bir ordu olduğunu bildirdi: “Vəzifəyə diqqət və dini ruhiyyənin dərinləşdirilməsi sahəsində görülən işlər səbəb olub ki, ordumuz dini etiqadlara bağlanıb, dini meyarları əsas götürür.”
 
Ayətullah Xamenei bildirib: “Belə bir ordu heç bir şübhəsiz bütün imtahanlardan başıuca çıxacaq.”
 
Silahlı qüvvələrin komandanı bu ordunun 8 illik müqəddəs müdafiə illərində böyük sınaqlardan keçdiyini bildirdi. Bunu ordu üçün imtiyaz saydı. Rəhbər buyurdu: “İran İslam Respublikasının ordusu müqəddəs müdafiə illərində müxtəlif əməliyyatlardan keçib və böyük işlər görüb.”
 
Cənab rəhbər hərbçilərə xitabən buyurdu: “Hərbçi olmaq bir iftixardır. Bu xüsusiyyəti gücləndirməyə çalışın.”
 
Həzrət Ayətullah Xamenei İslam Respublikasının silahlı qüvvələrini dünyada mövcud olan ordularla müqayisə edərək buyurdu: “Ordu, Sepah, Bəsic dünyaya yeni bir mədəniyyət gətirib. İstismarçılıq, işğalçılıq qarşısında yeni bir mədəniyyət ortaya qoyulub.”
 
Cənab rəhbər imperialist ölkələrin, xüsusilə Amerikanın işğalçı ruhiyyəsinin orduya hakim olduğunu bildirib: “Onlar haraya gedirlərsə fəsad yaradır, əxlaqsızlıq edir, xalqa işgəncə verir, qətliam törədirlər.”
 
Cənab rəhbər amerikalılıarın kütləvi qırğın silahına qarşı olması iddiasına belə münasibət bildirdi: “Onlar öz iddialarının ziddinə olaraq sərnişinsiz təyyarələri ilə Əfqanıstan və Pakistanda günahsız uşaqları, qadınları qətlə yetirirlər. Amerikanın aşkarda və gizli şəkildə himayə etdiyi terrorçular İraq və Suriyada dinc xalqı qırırlar.”
 
Cənab Xamenei Amerikanın ziddiyyətli mövqeyinə belə münasibət bildirdi: “Amerika və onun müttəfiqləri insan haqqlarından danışırlar. Onlar eyni zamanda Pakistan, Əfqanıstanda, İraq və Suriyada insanların qətliamını sükutla qarşılayırlar. Amma Amerikada bir neçə partlayış olan kimi dünyada hay-küy salırlar.”
 
Rəhbər buyurdu: “İran İslam Respublikası müsəlman məmləkətlərlə yanaşı istər Amerikada, Bostonda, istər Pakistan, Əfqanıstan, İraq və Suriyada terrora müxalifdir və bunu məhkum edir.”
 
Rəhbər buyurdu: “ABŞ və müttəfiqlərinin insan haqlarından danışmaqla yanaşı günahsız insanların qətlinə münasibət bildirməməsi ziddiyyətli mövqedir. Buna görə də İran qarşısında dayanmış ABŞ və digər cəbhələri məntiqsiz sayırıq. Bu məntiqsizlik, gücə güvənmək, etinasızlıq sayəsində Qərb mdəniyyəti süquta uğramaq üzrədir.”
 
Həzrət Ayətullah Xamenei bildirib: “Bu necə məntiqdir ki, Əfqanıstan və Pakistanda uşaqlar və qadınlar qətlə yetiriləndə, İraq və Suriyada terrorçular ABŞ tərəfindən himayə olunanda Qərb və sionist rejim faciələr törədəndə bu adi qarşılanır, amma Amerikada və ya bir Qərb ölkəsində bir partlayış olanda dünya ayağa qalxır.”
 
Rəhbər buyurdu: “ABŞ və Qərbdə belə bir ruhiyyə var ki, onlar fərqlidirlər. Amma bu ruhiyyə süqut səbəbidir.”
 
Cənab rəhbər İran İslam Respublikasında məntiqin hakim olduğuna işarə ilə buyurdu: “Bu məntiqli düşüncə qədim bir mədəniyyətin əsaslarını təşkil edir.”
 
Həzrət Ayətullah Xamenei söhbətinin bir hissəsində hərbçi ailələrinin fədakarlığından danışdı. O hərbçi övladları haqqında xoş sözlər deyərək buyurdu: “Hərbçi ailələri öz ailə başçıları ilə iftixar etməlidir.”
 
Cənab rəhbərin çıxışından öncə ordu komandanı Salehi İran İslam Respublikası ordusunun mövcud imkanlarından danışdı. Görüşdən əvvəl canbazların cənab rəhbərlə görüşü oldu.