Hacı Mehdi Məmmədov yaxın günlərdə azad olunacaq

Əldə etdiyimiz məlumata görə, 16-cı Cəzaçəkmə Müəssisəsindən hələ ki, amnistiya aktına düşən heç bir məhkum azad edilməyib.

Həmçinin əldə etdiyimiz məlumata görə, amnistiya aktı bu Cəzaçəkmə Müəssisəsində 28 May – Respublika günündə icra olunacaq.

Böyük ehtimallara görə Hacı Mehdi Məmmədov məhz bu gün azad ediləcək.

Amnistiya layihəsinə əsasən, böyük ictimai təhlükə törətməyən və az ağır cinayətlərə görə məhkum edilmiş qadınlar, cinayət törədərkən 18 yaşına çatmayanlar, I və II qrup əlillər, 60 yaşına çatan kişilər, öhdəsində yetkinlik yaşına çatmayan, yaxud I və ya II qrup əlil övladı olanlar, Azərbaycanın suverenliyinin və ərazi bütövlüyünün qorunması uğrunda döyüşlərdə iştirak etmiş, Azərbaycan ərazisinin bir hissəsinin işğalı nəticəsində öz doğma torpaqlarından məcburi köçürülmüş və bəzi digər kateqoriyalardan olan şəxslər azadlıqdan məhrum etmə cəzasından azad ediləcəklər. Amnistiya Aktının həmçinin azadlıqdan məhrum etmə cəzasının çəkilməmiş hissəsi bir ildən artıq olmayan, məntəqə tipli cəzaçəkmə müəssisələrində cəza çəkən, islah işləri, ictimai işlər cəzalarına məhkum edilmiş bütün şəxslərə, habelə cərimə cəzasına məhkum edilmiş, cəzasının çəkilməsi təxirə salınmış, şərti məhkum edilmiş və digər qruplara daxil olan bir sıra məhkumlara tətbiq edilməsi və bu kateqoriya şəxslərin cəzadan azad olunmaları təklif edilir.

Hacı Mehdi Məmmədovun həbs müddətinin bitməsinə 9 ay qalır və onun öhdəsində 2 azyaşlı uşaq var.

Qeyd edək ki, qəbul olunmuş qərarlar əsasında 25.05.2013-cü il tarixədək Amnistiya Qərarı Penitensiar xidmətin tabeliyində olan cəzaçəkmə müəssisələrində saxlanılan 800 nəfər məhkuma tətbiq edilib. Amnistiya Qərarının icrası Penitensiar xidmətin müvafiq Komissiyasının, Ədliyyə naziri yanında fəaliyyət göstərən İctimai Komitənin, Ombudsman aparatının, digər dövlət və qeyri-hökumət təşkilatı nümayəndələrinin və eləcə də vətəndaş cəmiyyəti üzvlərinin iştirakı ilə həyata keçirilir. Amnistiya Qərarının icrası davam edir.(İslamazeri)