Ənsarullah Hərəkatı: Cenevrə danışıqları ancaq Yəmənli qruplar arasında baş tutacaq

Deyerler-in Yaxın Şərq KİV-lərinə istinadən verdiyi xəbərə görə, Yəmənin Ənsarullah Hərəkatının sözçüsü Məhəmməd Əbdüs-Salam, Cenevrə danışıqlarının siyasi qüvvələr arasında olduğunu qeyd edərək, istefa verərək qaçmış sabiq prezident Abdur-Rabbu Mansur Hadi və sabiq baş nazir Xalid əl-Bəhhahın Yəməndəki heç bir qrupun nümayəndəsi olmadıqları üçün bu danışıqlarda iştirak etməməli olduğunu bildirib. Ənsarullah sözçüsü, bu ölkənin siyasi gələcəyində hər hansı bir yerlərinin olmadığını bildirib.

Yəmən xalqını qətliam edən və ölkənin dağıntılara çevrilməsinə səbəbkar olan Mansur Hadi və əl-Bəhhahın açıqlamalarının əhəmiyyətsiz olduğunu deyən Ənsarullah sözçüsü, onların açıqlamalarının danışıqlara qarşı olmalarını göstərdiyini söyləyib.

Əbdüs-Salam həmçinin Ənsarullah Hərəkatının Cenevrə danışıqlarına dəstək verdiyini yenidən təkrarlayaraq, hərəkatın məntiqsiz hədə ehtiva edən heç bir təklifin qarşısında təslim olmayacağını bildirib.

Ənsarullah Hərəkatı rəsmilərinin Rusiya rəsmilərilə danışıqlarına toxunan Məhəmməd Əbdüs-Salam, görüşlərin çox müsbət keçdiyini və Rusiyanın da Cenevrədə Yəmən daxili bütün siyasi qrupların heç bir şərt irəli sürmədən danışıqlara qatılmalarına tam dəstək verdiyini bildirib. O, Rusiyanın Yəmənə hücumların dayandırılması istiqamətində səy göstərdiyini dilə gətirib.