اسلام ٹائمز۔ افغانستان سے آنیوالے دہشت گردوں نے پاکستانی فورسز کی چیک پوسٹ پر شدید فائرنگ کی ہے، جسکی زد میں آکر تین اہلکار شہید جبکہ دو شدید زخمی ہوگئے ہیں۔ باجوڑ میں تحصیل ماموند میں فورسز کی چیک پوسٹ پر دہشت گردوں کے حملے میں کیپٹن سمیت 3 سکیورٹی اہلکار شہید جبکہ 2 زخمی ہو گئے ہیں۔ میڈیا رپورٹس کے مطابق افغان صوبہ کنڑ سے حملہ آور ہونے والے دہشتگردوں نے سیکیورٹی فورسز کی چیک پوسٹ پر خودکار ہتھیاروں سے شدید فائرنگ کی، جس کے نتیجے میں کیپٹن اور 2 سکیورٹی اہلکار جاں بحق جبکہ 2 سیکیورٹی اہلکار شدید زخمی ہو گئے ہیں۔ زخمی اہلکاروں کو پشاور سول ہسپتال منتقل کر دیا گیا ہے، جہاں انہیں ابتدائی طبی امداد دی جار ہی ہے۔ واضح رہے کہ پاکستانی سکیورٹی فورسز پر افغانستان سے سرحد پار کرکے آنے والے دہشت گردوں کا یہ کوئی پہلا حملہ نہیں ہے بلکہ اس سے پہلے بھی واقعات پیش آ چکے ہیں جن پر دفتر خارجہ نے افغانستان سے احتجاج کرتے ہوئے واقعات کو روکنے کا مطالبہ کیا تھا۔