0
Friday 7 May 2021 - 16:01

Ayətullah Xamenei Beynəlxalq Qüds günü münasibətilə çıxış edib - Təfərrüat

Story Code : 931288
Ayətullah Xamenei Beynəlxalq Qüds günü münasibətilə çıxış edib - Təfərrüat
Ayətullah Xamenei çıxışı zamanı bildirib ki, İsrail rejimi ilə mübarizə hamının öhdəsinə düşən vəzifədir: "Bu qaniçən rejimlə mübarizə aparmaq zülm və terrorizmlə mübarizədir".

Ayətullah Xamenei qeyd edib ki, Fələstin məsələsi hələ də İslam ölkələri arasında ortaq olan ən vacib məsələdir: "Fələstin məsələsi hələ də İslam ümmətinin ən vacib və canlı məsələsidir. Zalım kapitalist sistemin siyasəti bir millətin evini, vətənindən, ata-baba torpağından əlini kəsib və içində bir terror rejimi, xarici bir xalq qurub. Sionist rejimin qurulmasının boş məntiqindən daha zəif və əsassız nə var? İddialara görə, avropalılar II Dünya müharibəsi illərində yəhudilərə zülm ediblər, buna görə yəhudilərin qisası Qərbi Asiyadakı bir milləti didərgin salmaqla və orada vəhşilik göstərməklə alınmalıdır. Qərb hökumətlərinin sionist rejimə olan dəyişməz dəstəyinə arxalanmaları və bununla da insan haqları və demokratiya ilə bağlı bütün yalan iddialarını saxtalaşdırması məntiqlidir və bu gülünc hekayə yetmiş ildən çoxdur ki davam edir".

Ayətullah Xamenei çıxışının davamında "Sionistlər ilk gündən işğal altındakı Fələstini bir terror mərkəzinə çevirdilər. İsrail bir ölkə deyil, Fələstin xalqına və digər müsəlman millətlərə qarşı bir terror qarnizonudur. Bu rejimə qarşı mübarizə, zülmə qarşı mübarizə, terrorizmə qarşı mübarizədir və bu bir ictimai borcdur. İslam ümmətindəki zəiflik və bölünmə Fələstinin qəsb edilməsinə yol açır. Qəsbkar rejim 1948-ci ildə qurulsa da, İslam bölgəsindəki bu həssas nöqtəyə müdaxilə hazırlıqları illər öncə başlamışdı. Bu illər Qərbin dünyəviliyi, ekstremist və kor millətçiliyi idarə etmək, Qərbin ovsunladığı və ya sayı çox olan avtoritar dövlətləri hakimiyyətə gətirmək üçün İslam ölkələrinə aktiv müdaxiləsi ilə üst-üstə düşür. Həmin illərdə İran, Türkiyə və Qərbi Asiyanın ərəb ölkələrindən Şimali Afrikaya qədər olan hadisələrin araşdırılması müsəlman ümmətindəki zəifliyin və bölünmənin Fələstinin qəsb edilməsi və təkəbbür göstərənlərin fəlakətinə yol açdığı acı həqiqətini ortaya qoyur. O dövrdə həm kapitalist, həm də kommunist düşərgələrin sionist qitələrlə birləşməsi ibrətamizdir. İngiltərə plan qurdu və təqib etdi, sionist kapitalistlər bunu pul və silahla həyata keçirtdi, Sovet İttifaqı qanunsuz dövlətin qurulmasını rəsmiləşdirən və oraya çox sayda yəhudini göndərən ilk hökumət idi. Qəsb rejimi bir tərəfdən İslam dünyasındakı vəziyyətin, digər tərəfdən bu plan və Avropa təcavüzünün məhsulu idi", - deyə bildirib.

Ali lider daha sonra bunları qeyd edib: "Bu gün dünya əvvəlki kimi deyil. Bu həqiqəti heç vaxt unutmamalıyıq. Bu gün güclər nisbəti İslam dünyasının lehinə dəyişib. Avropa və ABŞ-da baş verən müxtəlif siyasi və sosial hadisələr Qərbin dərin struktur, idarəetmə və mənəvi zəifliklərini dünyaya ifşa etdi. ABŞ-dakı seçki hadisələri, təkəbbürlü idarəçilərinin qalmaqallı sınağı, eyni zamanda ABŞ və Avropadakı koronavirus xəstəliyi ilə uğursuz bir illik qarşıdurma, son dövrlərdə Avropanın böyük ölkələrindəki siyasi və sosial qarışıqlıqlar hamısı tənəzzül əlamətləridir. Digər tərəfdən, ən həssas İslam bölgələrində müqavimət qüvvələrinin böyüməsi, onların müdafiə və hücum qabiliyyətlərinin artması, müsəlman xalqlarda özünəməxsus şüurun və motivasiyanın, ümidin artması, İslam və Quran şüarlarının böyüməsi, xalqlarda müstəqillik və özünə güvənmənin böyüməsi mübarək əlamətlərdir. Bu daha yaxşı bir gələcək vəd edir".

Ayətullah Xamenei müsəlmanların Qüds istiqamətində birləşməli olduğunu vurğulayıb: "Bu mübarək gələcəkdə müsəlman ölkələrinin çiçəklənməsi əsas hədəf olmalıdır və bu, çox da uzaq görünmür. Bu artımın mərkəzində bütün ölkə mənasını verən Fələstin və müqəddəs Qüdsün taleyi durur. Bu, İmam Xomeyninin (Allah ona rəhmət etsin) nurani qəlbini Ramazan ayının son cümə günü Beynəlxalq Qüds günü elan etməyə vadar edən həqiqətdir. Müqəddəs Qüds istiqaməti boyunca müsəlmanların yüksəlməsi sionist düşmən, Amerika, Avropa tərəfdarlarının kabusudur. "Əsrin müqaviləsi"nin uğursuz planı və daha sonra bir neçə zəif ərəb dövlətinin qəsbkar rejim ilə münasibətlərini normallaşdırmaq cəhdi bu kabusdan qaçmaq üçün çıxılmaz cəhdlərdir. Qəti deyirəm, bu səylər nəticə verməyəcək. Sionist rejimin çöküşü başlayıb və dayanmayacaq".

İranın Ali lideri bildirib ki, işğal olunmuş ərazilərdə davamlı müqavimət və fələstinli mücahidlərə qlobal müsəlman dəstəyi olmalıdır:
"Gələcəyi iki vacib amil müəyyənləşdirir. Birincisi və ən əsası Fələstin əraziləri daxilində müqavimətin davam etməsi, cihad, şəhidlik xəttinin güclənməsi, ikincisi, dünyadakı müsəlman dövlətlərin və millətlərin Fələstin mücahidlərinə qlobal dəstəyidir. Hamımız - dövlət adamları, ziyalılar, din alimləri, partiyalar və qruplar, qeyrətli gənclər və başqaları - bu qlobal hərəkatda yerimizi tapmalı və rol oynamalıyıq".
Ali lider sonra fələstinli gənclər başda olmaqla, ərəb dilli ölkələrin gənclərinə ərəbcə müraciət edib. /Eastnews/