امیدوار فارم 45 بچا کر رکھیں، چھاپے مارے جائیں گے اور فارم چھینا جائے گا، علیمہ خان

اسلام ٹائمز۔ بانیٔ پاکستان تحریکِ انصاف کی ہمشیرہ علیمہ خان نے کہا ہے کہ امیدوار اپنا فارم 45 بچا کر رکھیں، اب چھاپے مارے جائیں گے اور فارم 45 چھینا جائے گا۔ لاہور میں انسدادِدہشت گردی عدالت کے باہر علیمہ خان نے میڈیا سے گفتگو کے دوران کہا ہے کہ پی ٹی آئی کل اپنا لائحہ عمل بتائے گی۔ اُن کا کہنا تھا کہ قوم پرجوش طریقے سے ووٹ دینے نکلی ہے، 8 فروری کی خوشی منانی چاہیے یہ پاکستان کا تاریخی دن تھا، اصلی انقلاب 8 فروری کو آیا ہے۔ علیمہ خان کا کہنا تھا کہ پاکستانیوں نے دکھا دیا کہ ہم ظلم کے نیچے نہیں دبیں گے، وہ پرانا زمانہ تھا کہ لوگ پانچ ہزار روپے پر ووٹ ڈلواتے تھے۔ انہوں نے مزید کہا کہ یہ کیا وکٹری اسپیچ ہوتی ہے جو ساتھ فیملی کھڑی تھی،کل سے جو تماشا لگایا ہوا ہے انہیں شرم نہیں آئی۔

علیمہ خان نے کہا ہے کہ ہمارا ووٹ کہیں غائب ہو گیا ہے ہمیں تلاش کرنا ہے، ہمارا ووٹ جدھر بھی ہے ہمیں واپس کریں۔ انہوں نے کہا کہ امیدواروں کو بانی پی ٹی آئی نے امانت کے طور ہر ٹکٹ دیا، یہ لوگوں کی امانت ان امیدواروں کے پاس ہے۔ اُن کا آزاد امیدواروں کا پارٹی بدل لینے سے متعلق کہنا تھا کہ اگر یہ آئی پی پی میں جاتے ہیں تو لوگ ان سے جواب خود لے لیں گے۔ یاد رہے کہ انسدادِ دہشت گردی کی لاہور عدالت میں 9مئی جلاؤ گھیراؤ کے مقدمات پر سماعت ہوئی۔ بانی پی ٹی آئی کی بہنوں، زین قریشی اور دیگر کی جانب سے عبوری درخواستِ ضمانت پر عدالت نے وکلا کو دلائل کے لیےطلب کرلیا۔ عدالت نے عبوری ضمانتوں میں 22 فروری تک توسیع کردی۔