جنگلات اور گیسٹ ہاؤسز معاملے پر پہلے اتمام حجت، پھر عوام میں جائیں گے، کاظم میثم

اسلام ٹائمز۔ اپوزیشن لیڈر گلگت بلتستان اسمبلی و پارلیمانی لیڈر ایم ڈبلیو ایم جی بی کاظم میثم نے اپنے ایک بیان میں کہا ہے کہ وزیراعلٰی گلگت بلتستان کس آئینی مسودے کی بات کر رہے ہیں قوم کو آگاہ کریں۔ انہوں نے جس انداز سے آئینی مسودے کا ذکر کیا ہے وہ انتہائی تشویشناک ہے۔ تمام سٹیک ہولڈرز کو اعتماد میں لیے بغیر کوئی بھی سیٹ اپ قابل قبول نہیں ہوگا۔ پورے گلگت بلتستان کا مستقبل کوئی مذاق نہیں ہے۔ اس ایشو پر پوری قوم کو اعتماد میں لے کر آگے بڑھنا ہوگا۔ دو ارب کی بجٹ کٹوتی اتحادی جماعتوں سے جنکی وفاق میں حکومت ہے بحال نہیں ہو رہی وہ کس طرح کے آئینی حقوق اور سیٹ اپ کی بات کر رہے ہیں۔ حفیظ الرحمان اور امجد ایڈووکیٹ پہلے ہمارے حصے کے بجٹ کو بحال کریں اس کے بعد جی بی کو سوئٹزرلینڈ بنانے کی بات کریں۔