آیت اللہ سید ابراہیم رئیسی کو مشہد میں سپرد خاک کر دیا گیا

اسلام ٹائمز۔ ہیلی کاپٹر حادثے میں شہید ہونے والے ایرانی صدر آیت اللہ سید ابراہیم رئیسی کو مشہد میں سپرد خاک کر دیا گیا۔ ایرانی میڈیا کے مطابق آیت اللہ سید ابراہیم رئیسی کی تدفین مشہد میں روضہ امام علی رضا کے احاطے میں ہوئی۔ آیت اللہ سید ابراہیم رئیسی کا جسد خاکی تدفین کے لیے مشہد میں امام علی رضا کے روضے پر پہنچا تو وہاں لوگوں کی بڑی تعداد موجود تھی۔ اس سے قبل شہر بیرجند میں بھی آیت اللہ سید ابراہیم رئیسی کو الوداع کہنے کے لیے عوام کی بڑی تعداد نے شرکت کی تھی۔ آیت اللہ سید ابراہیم رئیسی اور ان کے رفقاء کی نماز جنازہ کل تہران میں ادا کی گئی تھی۔

ایران کے سپریم لیڈر آیت اللہ خامنہ ای نے تہران میں ایرانی صدر ابراہیم رئیسی، وزیر خارجہ حسین امیر عبداللہیان اور دیگر کی نماز جنازہ پڑھائی، جس میں ہزاروں کی تعداد میں افراد نے شرکت کی۔ یاد رہے کہ ایرانی صدر ابراہیم رئیسی، ایرانی وزیر خارجہ اور دیگر 6 افراد اتوار کو ہیلی کاپٹر حادثے میں شہید ہوئے تھے۔ ایرانی صدر اور رفقاء کے اعزاز میں آج اقوام متحدہ جنرل اسمبلی میں ایک منٹ کی خاموشی اختیار کی گئی۔