ایران آزادی کی تحریکوں کا رہنماء ہے، شیخ نعیم قاسم

اسلام ٹائمز۔ لبنان کی مقاومتی تحریک "حزب‌ الله" کے ڈپٹی سیکرٹری جنرل "شیخ نعیم قاسم" نے کہا کہ ایران دنیا میں آزادی اور مقاومتی تحریکوں کا روح رواں ہے۔ انہوں نے ان خیالات کا اظہار امام خمینی رہ کی برسی کی تقریب سے خطاب میں کیا۔ برسی کی یہ تقریب بیروت میں ایرانی سفارت خانے میں منعقد ہوئی۔ شیخ نعیم قاسم نے کہا کہ صیہونی رژیم کی حمایت کرنے والے ون ورلڈ آرڈر سے مقابلے کی ذمے داری بھی ایران ہی کے کندھوں پر ہے۔ انہوں نے کہا کہ امریکہ اپنے انتخابات اور بین الاقوامی منظر نامے میں دنیا کی توجہ حاصل کرنا چاہتا ہے وگرنہ امریکہ کو غزہ کے خلاف اسرائیل کی جنگ کے اختتام سے کوئی دلچسپی نہیں۔ شیخ نعیم قاسم نے مزید کہا کہ مظلوم فلسطینی بہت ثابت قدم ہیں اور وہ ابھی تک قتل و غارت گری کی صیہونی مشین کے سامنے ڈٹے ہوئے ہیں۔