ماسکو کیساتھ باہمی مفادات کی بنیاد پر تعلقات چاہتے ہیں، طالبان

اسلام ٹائمز۔ طالبانی وزیر محنت و سماجی امور عبدالمنان عمری کہ جو سینٹ پیٹرزبرگ انٹرنیشنل اکنامک فورم میں شرکت کے لئے روس میں موجود ہیں، نے صحافیوں کے سوالات کے جواب میں کابل کے ساتھ باہمی تعلقات کو فروغ دینے کی ضرورت پر مبنی روسی صدر ولادیمیر پیوٹن کے بیانات کے بارے تاکید کی ہے کہ افغان حکمراں ادارہ چاہتا ہے کہ روس کے ساتھ باہمی تعلقات، مفادات کی بنیاد پر استوار ہوں!
 
سینٹ پیٹرزبرگ انٹرنیشنل اکنامک فورم کے 27ویں اجلاس میں تقریر کے دوران بھی عمری کا کہنا تھا کہ افغانستان ایک آزاد و محفوظ ملک ہے اور افغانستان کے جغرافیائی محل وقوع کو تجارت اور خطے کو آپس میں جوڑنے کے لئے بہتر طور پر استعمال کیا جانا چاہیئے۔

طالبانی وزیر محنت نے کہا کہ افغانستان پر عائد پابندیوں نے اس ملک کو کسی بھی دوسرے فریق سے بڑھ کر نقصان پہنچایا ہے اور اب ان پابندیوں کو ہٹ جانا چاہیئے۔

اپنی گفتگو کے آخر میں عبدالمنان عمری نے مزید کہا کہ افغانستان، شنگھائی تعاون تنظیم کا ایک مبصر رکن ہے لیکن امارت اسلامیہ کے نمائندوں کی موجودگی کے بغیر ہونے والے اس تنظیم کے فیصلے یکطرفہ ہوں گے!