کوئٹہ، کانگو وائرس سے بچاؤ کیلئے محکمہ لائیو اسٹاک کیجانب سے اسپرے مہم جاری

اسلام ٹائمز۔ ڈسٹرکٹ لائیو اسٹاک آفیسر کوئٹہ ڈاکٹر داؤد خان نے ضلع کوئٹہ کی حدود میں محکمہ لائیو سٹاک کے ویٹرنری آفیسرز اور دیگر عملہ کی ٹیمیں تشکیل دے کر کانگو وائرس کے خلاف سپرے مہم شروع کر دی ہے۔ ڈی جی پی آر بلوچستان کے پریس ریلیز کے مطابق ٹیمیں کوئٹہ شہر میں مویشی منڈیوں اور کوئلے کے داخلی مقامات پر سپرے کرنے میں مصروف ہیں۔ میاں غنڈی کے داخلی راستے کے علاوہ درخشاں چیک پوسٹ اور بلی چیک پوسٹ پر سپرے کے لیے ٹیمیں بھی موجود ہیں۔ اپنے جانوروں کو کانگو وائرس سے بچانے کے لیے اسپرے کرنے کی تجویز دی گئی ہے۔ اس کے علاوہ ڈاکٹر داؤد خان نے قصابوں کو بھی احتیاطی تدابیر کے طور پر جانوروں کو ذبح کرتے وقت منہ پر ماسک اور ہاتھوں پر دستانے پہننے کی تنبیہ کی ہے۔ اس کے علاوہ کسی بھی ممکنہ وباء سے بچنے کے لیے تمام شہریوں سے بھی اپیل کی گئی کہ وہ اپنے گھروں میں رکھے گئے جانوروں پر اسپرے کریں جو قربانی کے لیے ہیں اور جانوروں کی قربانی کرتے وقت حفاظتی تدابیر اختیار کریں۔ ڈسٹرکٹ آفیسر لائیو سٹاک آفیسر ڈاکٹر داؤد خان کاکڑ نے کہا کہ محکمہ لائیو اسٹاک اس مہم میں مویشی بانوں کے ساتھ تعاون کے لئے ہمہ وقت تیار ہے۔