اسلام ٹائمز۔ کراچی میں بلدیاتی انتخابات کے حوالے سے لیاری کے ککری گراؤنڈ میں پاکستان تحریک انصاف کے زیرِ اہتمام عوامی جلسے کا انعقاد کیا گیا۔ جلسے سے پی ٹی آئی کے سربراہ عمران خان نے خصوصی خطاب کیا، جبکہ پی ٹی آئی رہنماؤں عمران اسماعیل، علی زیدی، ڈاکٹر عارف علوی و دیگر نے بھی خطاب کئے۔ جلسے میں خواتین اور بچوں سمیت ہزاروں افراد شریک تھے۔ جلسے سے خطاب کرتے ہوئے عمران خان نے کہا کہ پاکستان تحریک انصاف کے چیئرمین عمران خان نے کہا ہے کہ شہر قائد پر عرصہ دراز سے ایک جماعت کی اجارہ داری قائم ہے، اس لئے عوام کو 5 دسمبر کو نئی تاریخ رقم کرنی ہے، نئے کراچی اور نئے لیاری کے لئے عوام کے پاس آئے ہیں، کراچی پاکستان کا معاشی حب ہے، اس کو بچانا ہم سب کی ذمہ داری ہے۔ کراچی میں خون خرابے کا کھیل ختم کرکے دکھائیں گے۔