کراچی، جماعت اسلامی کے وفد کی ایرانی قونصلیٹ میں قونصل جنرل حسن نوریان سے ملاقات و تعزیت

اسلام ٹائمز۔ جماعت اسلامی کے اعلیٰ سطحی وفد نے کراچی میں ایرانی قونصلیٹ پہنچ کر قونصل جنرل حسن نوریان سے ملاقات کی، وفد نے ایرانی صدر آیت اللہ ڈاکٹر سید ابراہیم رئیسی، وزیر خارجہ حسین امیر عبداللہیان و دیگر رفقاء کی ہیلی کاپٹر حادثے میں شہادت پر اظہار افسوس کیا اور کہا کہ ڈاکٹر ابراہیم رئیسی ایک انقلابی لیڈر تھے، ان کی وفات سے پوری امت مسلمہ کو صدمہ ہوا ہے، جماعت اسلامی سمیت پوری پاکستانی قوم دکھ کی اس گھڑی میں ان کے ساتھ برابر کی شریک ہے۔ وفد میں مرکزی رہنما اسد اللہ بھٹو، ڈاکٹر معراج الہدیٰ صدیقی، صوبائی امیر محمد حسین محنتی اور سیکرٹری اطلاعات مجاہد چنا شامل تھے۔ وفد نے مرحومین کی مغفرت اور درجات کی بلندی و اہل خانہ کیلئے صبر جمیل کیلئے بھی دعا کی۔ صوبائی امیر محمد حسین محنتی نے کہا کہ اسلامی جمہوریہ ایران کے صدر آیت اللہ ڈاکٹر سید ابراہیم رئیسی کی ساتھیوں سمیت ہیلی کاپٹر حادثے میں شہادت کے سانحہ پر پوری امت غمگین ہے، عالم اسلام ایک نڈر اور جرائت مند رہنما سے محروم ہو گیا ہے۔

محمد حسین محنتی نے کہا کہ صدر رئیسی ایک دبنگ انسان تھے، جو امریکا کی تمام دھمکیوں اور پابندیوں کے باوجود اپنے مؤقف پر ڈٹے رہے اور اپنے ملک و قوم کی فلاح و بہبود و ترقی کیلئے اقدامات کرتے رہے۔ انہوں نے کہا کہ صدر رئیسی کی کوششوں سے مسئلہ فلسطین، غزہ، حماس کے مجاہدین اور اہل فلسطین کو بڑا حوصلہ ملا۔ انہوں نے کہا کہ پاکستان کے ساتھ خوشگوار و مضبوط تعلقات استوار رکھنے میں بھی بڑا اہم کردار ادا کیا، سعودی عرب کے ساتھ کشیدہ صورتحال کو معمول پر لانے میں بھی ان کے حکیمانہ کردار کو فراموش نہیں کیا جا سکتا، صدر رئیسی کی شہادت ناصرف ایرانی قوم بلکہ پوری امت کا ناقابل تلافی نقصان ہے۔ صوبائی امیر محمد حسین محنتی نے تعزیتی کتاب میں اپنے تاثرات بھی تحریر کئے۔