عمران خان کی حماد اظہر کے بعد میاں اسلم اقبال کو بھی منظر عام پر آنے کی ہدایت

اسلام ٹائمز۔ بانی پی ٹی آئی عمران خان نے تحریک انصاف کے راہنما حماد اظہر کے بعد میاں اسلم اقبال کو بھی منظر عام پر آنے کی ہدایت کر دی۔ ذرائع کے مطابق بانی پی ٹی آئی کی جانب سے حماد اظہر اور میاں اسلم اقبال کو حکومت مخالف تحریک چلانے کیلئے منظر عام پر آنے کی ہدایت کی گئی ہے۔ ذرائع کا کہنا ہے کہ تحریک انصاف کے مرکزی راہنما مراد سعید تاحال روپوش ہی رہیں گے۔ دوسری جانب حماد اظہر تحریک انصاف کے مرکزی سیکرٹریٹ پہنچے، انہوں نے کہا کہ کل مجھے بانی تحریک انصاف کا پیغام موصول ہوا کہ اب آپ کے باہر آنے کا وقت ہوگیا ہے۔ راہنما تحریک انصاف حماد اظہر نے کہا کہ یہاں سے پشاور جا کر قبل از گرفتاری ضمانت لے کر عدالت میں پیش ہوں گا، اب دیگر روپوش راہنما باہر آئیں گے۔

حماد اظہر کی سینٹرل سیکرٹریٹ آمد کے بعد اسلام آباد پولیس بھی پی ٹی آئی سینٹرل سیکرٹریٹ پہنچ گئی لیکن حماد اظہر آدھہ گھنٹہ قبل ہی سینٹرل سیکرٹریٹ سے پشاور کے لیے روانہ ہو گئے۔ پی ٹی آئی سینٹرل سیکرٹریٹ کے مرکزی دروازے کو اسلام آباد پولیس نے بند کر دیا۔ پی ٹی آئی سینٹرل سیکرٹریٹ میں اقوام متحدہ کا وفد پی ٹی آئی قیادت سے ملاقات میں مصروف تھا۔ پی ٹی آئی قیادت اور اقوام متحدہ وفد سینٹرل سیکرٹریٹ کے اندر موجود تھے۔ ایس پی سٹی خان زیب اور ایس ایچ او کراچی کمپنی محمد نعیم پی ٹی آئی سینٹرل سیکرٹریٹ میں موجود رہے۔