بار اور بنچ کا تعلق انتہائی اہمیت کا حامل ہے، راجہ سعید اکرم

اسلام ٹائمز۔ چیف جسٹس آزاد کشمیر سپریم کورٹ جسٹس راجہ سعید اکرم خان نے کہا ہے کہ بار اور بنچ کا تعلق انتہائی اہمیت کا حامل ہے، جتنا بار اور بنچ کا تعلق مضبوط ہو گا اتنے ہی فیصلے کرنے میں آسانی ہو گی اس جدید دور میں ویڈیو لنک کے ذریعے کیسز کی سماعت کا آغاز کیا تاکہ جلد از جلد انصاف کی فراہمی ممکن ہو سکے۔ وکلاء کے مسائل کے حل کے لیے مشنری جذبے کے ساتھ کوشش کی جا رہی ہے تاکہ دور حاضر سے ہم آہنگ سستا اور فوری انصاف فراہم کیا جا سکے۔ ان خیالات کا اظہار انھوں نے ڈسٹرکٹ بار ایسوسی ایشن پونچھ کے زیراہتمام منعقدہ تقریب سے خطاب کرتے ہوئے کیا۔ اس موقع پر سپریم کورٹ آف آزاد جموں و کشمیر کے سینئر جج جسٹس خواجہ محمد نسیم، جج سپریم کورٹ جسٹس راجہ رضا علی خان بھی موجود تھے۔ اس موقع پر صدر ڈسٹرکٹ بار ایسوسی ایشن راولاکوٹ نے اپنے مسائل کے حوالے سے گفتگو کی جب کہ سردار عبدالخالق خان ایڈووکیٹ نے تاریخی محرکات پر تفصیلی روشنی ڈالی۔ چیف جسٹس آزاد کشمیر نے کہا کہ ہمارے آباؤ اجداد نے اسی ملک کی آزادی کے لیے خون کے نذرانے پیش کیے جہاں ہم آج چین کا سانس لے رہے ہیں یہاں کے لوگوں کی جوڈیشری میں بڑی نمائندگی رہی ہے جن کے فیصلے ہمارے لیے رول ماڈل ہیں، وہ وقت تھا جب یہاں پانی دورسے لانا پڑتا تھا آج اللہ کے فضل سے تمام بنیادی سہولتیں میسر ہیں۔ انھوں نے کہا کہ ہم نے ہمیشہ وکلاء کی عزت نفس کا خیال رکھا ہے ہماری کوشش ہے کہ ماحول کو اور خوبصورت بنائیں۔ انھوں نے کہا کہ یہاں بڑا ٹیلنٹ ہے، عدلیہ، بیورو کریسی اور دیگر شعبوں میں اسی علاقے کے لوگوں نے بڑا نام کمایا ہمیں اس علاقے کے لوگوں سے قدرتی لگاؤ ہے۔