وفاقی اردو یونیورسٹی کراچی نے طلبہ تنظیموں پر پابندی لگا دی

اسلام ٹائمز۔ پاکستان کی جامعات میں جہاں طلبہ تنظیموں کے حوالے سے موضوع چرچہ کا باعث رہا ہے، وہیں اب کراچی کی معروف جامعہ نے طلبہ تنظیموں پر پابندی لگا دی ہے۔ حال ہی میں وفاقی اردو یونیورسٹی کی جانب سے یہ قدم اٹھایا گیا ہے۔ کراچی کی وفاقی اردو یونیورسٹی کی انتظامیہ کی جانب سے طلبہ تنظیموں سے متعلق قدم اٹھائے جانے پر کہا ہے کہ جامعہ نے تمام طلبا تنظیموں پر پابندی عائد کردی ہے، حکم کی خلاف ورزی کرنے والے طلبا کے داخلے منسوخ کردیئے جائیں گے جبکہ ردعمل کے طور پر فیصلے کے خلاف طلبا تنظیموں نے تشویش کا اظہار کردیا ہے۔

ذرائع کے مطابق وفاقی اردو یونیورسٹی کے قائم مقام رجسٹرار کی جانب سے جاری اعلامیہ میں کہا گیا ہے کہ وفاقی اردو یونیورسٹی میں طلبا تنظیموں پر پابندی عائد کردی گئی ہے، طلبا تنظیموں کو تدریسی اور غیر تدریسی سرگرمیوں کی اجازت نہیں ہوگی۔ اعلامیے میں کہا گیا ہے کہ حکم پر عمل نہ کرنے والے طلبا کے خلاف سخت کاروائی کی جائے گی جبکہ خلاف ورزی کرنے والے طلبا کا داخلہ بھی فوری منسوخ کردیا جائے گا۔ فیصلے کے خلاف اسلامی جمعیت طلبا اور پیپلز اسٹوڈنٹس فیڈریشن نے تشویش کا اظہار کیا ہے۔ ترجمان اسلامی جمعیت طلبا نے کہا کہ طلبا تنظیموں پر پابندی لگانا طالبعلموں کی آواز کو دبانے کے مترادف ہے۔