پی ٹی آئی سیکرٹریٹ اسلام آباد کا ایک حصہ گرا کر دفتر سیل کردیا گیا

اسلام ٹائمز۔ وفاقی دارالحکومت اسلام آباد میں پاکستان تحریک انصاف کے مرکزی سیکرٹریٹ پر کیپیٹل ڈیویلپمنٹ اتھارٹی نے انسداد تجاوزات آپریشن کرتے ہوئے پی ٹی آئی سیکرٹریٹ کا ایک حصہ گرا دیا اور دفتر سیل کردیا۔ آپریشن سے قبل پولیس نے پی ٹی آئی سیکرٹریٹ جانے والے راستوں کو بند کر دیا۔ سی ڈی اے نے آپریشن کے دوران پی ٹی آئی سیکرٹریٹ کا ایک حصہ گرا دیا اور  تحریک انصاف کا دفتر سیل کردیا۔ سی ڈی اے نے تحریک انصاف کے دفتر کو سیل کرنے کا حکم نامہ بھی چسپاں کردیا۔ سی ڈی اے کا مؤقف ہے کہ آپریشن بلڈنگ قوانین کی خلاف ورزی، غیر قانونی تعمیرات اور تجاوزات کے خاتمے کے لیےکیا گیا۔
 
دوسری جانب سیکرٹریٹ کے باہر میڈیا سے گفتگو میں پی ٹی آئی کے چیئرمین بیرسٹر گوہر نے سی ڈی اے کے اقدام کے خلاف ہائی کورٹ سے رجوع کرنے کا اعلان کیا ہے۔ چیئرمین پی ٹی آئی کا کہنا تھا کہ ہمارے پاس سیکرٹریٹ پر تجاوزات کے حوالے سے کبھی کوئی نوٹس نہیں آیا، سی ڈی اے اہلکاروں سے پوچھا کوئی آرڈر ہے تو دکھائیں مگر وہ نہیں دکھا سکے، تجاوزات تھیں تو ہمیں بتاتے ہم خود انہیں گرا دیتے۔ پی ٹی آئی کے سیکرٹری جنرل عمر ایوب کا کہنا تھا کہ سی ڈی اے کی کارروائی کے معاملے کو اسمبلی میں اٹھائیں گے، سی ڈی اے کی کارروائی کی شدید مذمت کرتے ہیں۔ ان کا کہنا تھا کہ  اسلام آباد انتظامیہ نے رات کے اندھیرے میں آپریشن کیا، سی ڈی اے نے بغیر نوٹس کارروائی کی ہے۔