میرواعظ عمر فاروق کو لگاتار چوتھے جمعہ کو بھی گھر میں نظربند رکھا گیا

اسلام ٹائمز۔ میرواعظ کشمیر مولوی محمد عمر فاروق کو مسلسل چوتھے جمعۃ المبارک کو بھی اپنی رہائشگاہ واقع سرینگر میں نظربند کرکے جامع مسجد سرینگر میں نماز جمعہ اور وعظ و تبلیغ جیسے اہم دینی اور منصبی فریضے کی ادائیگی سے روکا گیا۔ انجمن اوقاف جامع مسجد سرینگر کی جانب سے میراوعظ کی مسلسل نظربندی اور ان کے گھس سے باہر جانے پر قدغن عائد کئے جانے کو ’’حد درجہ افسوسناک‘‘ قرار دیا ہے۔ انجمن کی جانب سے جاری کیے گئے بیان میں کہا گیا ہے کہ میرواعظ کے تئیں انتظامیہ کی کارروائی نہ صرف ناقابل فہم ہے بلکہ اس طرح کے اقدام سے اُن ہزاروں لوگوں کے مذہبی جذبات کو شدید ٹھیس پہنچاتے ہیں، جو ہر جمعہ کو مرکزی جامع مسجد میں میرواعظ کے مواعظ حسنہ اور پند و نصائح سے مستفید ہونے کے لئے شہر و گام سے آتے ہیں اور انہیں مایوس لوٹنا پڑتا ہے۔ بیان میں انتظامیہ پر زور دیا گیا کہ وہ میرواعظ کی پُرامن دینی و منصبی ذمہ داریوں کی ادائیگی پر عائد قدغنوں کو ہٹائے کیونکہ اس طرح کی غیر جمہوری کارروائیاں جہاں بلا جواز ہیں، وہیں اس طرح کے اقدامات سے کچھ حاصل ہونے والا نہیں ہے۔ واضح رہے کہ میرواعظ مولوی محمد عمر فارق کشمیر کی تاریخی جامع مسجد سرینگر کے خطیب ہیں جبکہ وہ مزاحمتی تنظیم کُل جماعتی حریت کانفرنس کے چیئرمین بھی ہیں۔