مقبوضہ کشمیر کے ضلع بڈگام میں ابراہیم رئیسی کے اعزاز میں تعزیتی جلوس برآمد

اسلام ٹائمز۔ مقبوضہ کشمیر کے بڈگام ضلع میں انجمن شرعی شیعیان نامی تنظیم کی جانب سے تعزیتی جلوس برآمد کیا گیا جس میں گذشتہ ہفتہ ہیلی کاپٹر کریش میں شہید ہوئے ایرانی صدر سمیت دیگر شہداء کو خراج عقیدت پیش کیا گیا۔ مرکزی امام باڑہ بڈگام سے ماتمی جلوس برآمد کیا گیا جس میں لوگوں کی بڑی تعداد نے شرکت کی جس میں بزرگ، بچے اور خواتین نے بھی شرکت کی۔ جلوس بڈگام ٹاؤن کے مختلف سڑکوں سے گزرتے ہوئے واپس امام بارگاہ میں پُرامن طور اختتام ہوا۔ اس دوران قصبہ ماگام میں بھی ایک تعزیتی جلوس  برآمد ہوا جس میں مرد و زن کی بڑی تعداد نے شرکت کی۔

بڈگام ٹاؤن میں آج ہیلی کاپٹر کریش میں شہید ہوئے افراد کے اعزاز میں دکانیں بند رہیں۔ جبکہ جلوس میں شامل لوگوں نے ایران کے حق میں اور امریکہ مخالف نعرے بازی کی۔ جلوس کی قیادت انجمن شرعی شیعیان کے صدر اور علیحدگی پسند لیڈر آغا سید حسن الموسوی الصفوی نے کی۔ جلوس میں شامل لوگوں نے شہداء کربلا کو بھی یاد کرتے ہوئے مرثیہ خوانی کی۔ یاد رہے کہ 19 مئی اتوار کو ایرانی صدر ابراہیم رئیسی دیگر آفیشلز کے ہمراہ ہیلی کاپٹر میں سوار تھے، اس دوران آزربائیجان کے قریب ہیلی کاپٹر حادثہ کا شکار ہوگیا اور اس میں سوار سبھی افراد شہید ہوگئے۔