حکومت اپنی ناکامی کا غصہ اوچھے ہتھکنڈوں کے ذریعے نکال رہی ہے، پی ٹی آئی بلوچستان

اسلام ٹائمز۔ پاکستان تحریک انصاف بلوچستان کے رہنماء کا کہنا ہے کہ حکمرانوں کو نہ ہی قوم اور نہ عالمی برادری کی حمایت حاصل ہے۔ حکومت اپنی ناکامی کا غصہ اوچھے ہتھکنڈوں کے ذریعے نکال رہی ہے۔ اپنے بیان میں پی ٹی آئی رہنماء حاجی سیف اللہ کاکڑ نے پارٹی کے مرکزی سیکرٹریٹ میں توڑ پھوڑ کی مذمت کرتے ہوئے کہا کہ مرکزی سیکرٹریٹ سیل کرنے سے کچھ حاصل نہیں ہوگا۔ جو سونامی نااہل حکومت کے خلاف لوگوں کے سینوں میں ابل رہی ہے، اسے اوچھے ہتھکنڈوں سے سرد نہیں کیا جا سکتا۔ انہوں نے کہا کہ جعلی حکومت کے دن گنے جا چکے ہیں۔ حکمرانوں کو نہ قوم اور نہ ہی عالمی برادری کی حمایت حاصل ہے۔ حکومت اپنی ناکامی کا غصہ اوچھے ہتھکنڈوں کے ذریعے نکال رہی ہے۔ حاجی سیف اللہ کاکڑ نے کہا کہ پی ٹی آئی ایک حقیقت ہے۔ بدترین ظلم و ستم کے باوجود بھی قیادت کارکنوں اور قوم نے کوئی کمپرومائز نہیں کیا، نہ آئندہ کرے گی۔