رفح، غاصب صیہونی فوجیوں کے ہاتھوں انروا کا اسکول تباہ

اسلام ٹائمز۔ فلسطینی خبررساں ایجنسی شہاب نے اعلان کیا ہے کہ قابض صیہونی فوج نے غزہ کے جنوبی شہر رفح کے الشوقہ نامی علاقے میں واقع اقوام متحدہ کی امدادی ایجنسی انروا (UNRWA) کا ایک اور اسکول تباہ کر دیا ہے۔
 
ادھر فلسطینی ہلال احمر نے بھی اسپتالوں میں ایندھن ختم ہو جانے کے بارے سختی کے ساتھ خبردار کرتے ہوئے اعلان کیا ہے کہ غزہ کے ہسپتالوں میں صرف چند دنوں کے لئے ہی ایندھن باقی بچا ہے جس کے بعد ایندھن کے خاتمے کے باعث وہ مزید طبی امداد فراہم کرنے کے قابل نہیں رہیں گے۔

غزہ کے شہدائے الاقصی ہسپتال نے بھی اعلان کیا ہے کہ اس کے پاس صرف 3 دن کا ہی ایندھن باقی بچا ہے۔
 
مذکورہ ذرائع نے مزید کہا کہ شہدائے الاقصی ہسپتال گزشتہ چند گھنٹوں سے انتہائی تشویشناک حالت میں تھا اور بجلی کی بندش کے باعث مریضوں و زخمیوں کی بڑی تعداد موت کے منہ میں پہنچ چکی تھی۔