کراچی میں ایم کیو ایم لندن کا انتہائی مطلوب ملزم حامد پیا گرفتار

اسلام ٹائمز۔ پاکستان رینجرز اور پولیس نے ناظم آباد عیدگاہ میں مشترکہ کارروائی کرتے ہوئے ایم کیو ایم لندن کے انتہائی مطلوب ملزم محمد حامد عرف پیا کو گرفتار کرلیا ہے۔ ترجمان رینجرز کے مطابق کارروائی میں ملزم کے قبضے سے ایک ہینڈ گرنیڈ بھی برآمد ہوا، ملزم 2009ء تک ایم کیو ایم حقیقی کیلیے کام کر تا رہا، اس کے بعد ایم کیو ایم لندن گروپ میں شامل ہوگیا۔ ملزم کراچی میں لسانی، سیاسی اور مخالفین کی ٹارگٹ کلنگ کے علاوہ ڈکیت گروہ کا سرغنہ بھی رہا ہے، ملزم نے 1994ء سے اپر یل 2014ء تک  ٹارگٹ کلنگ میں ملوث ہونے کا اعتراف بھی کیا ہے۔ ترجمان کے مطابق گرفتار ملزم نے ایک پولیس اہلکار کی ٹارگٹ کلنگ میں بھی ملوث ہونے کا اعتراف کیا، ملزم نے 2007ء سے 2008ء ک اپنے ساتھیوں کے ہمراہ بینک ڈکیتیوں، 4 جیولری شاپس سے 123 تولہ سونا اور قیمتی سامان سے بھر ے ہو ئے کنٹینرز کو لوٹا۔

ملزم نے لیاری گینگ وار کے ہمراہ بھتہ وصولی میں بھی ملو ث ہونے کا انکشاف کیا۔ ملزم نے کراچی میں ایم کیو ایم لندن گروپ اور لیاری گینگ وار کو درجنوں کلاشنکوف، ایل ایم جی اور ہزاروں کی تعداد میں ایمونیشن بھی سپلائی کیا جو کراچی میں دہشتگردی کے لیے استعمال ہوتا رہا ہے۔ ترجمان کے مطابق ملزم 2014ء سے سکھر، پشاور، اسلام آباد میں روپوش رہ چکا ہے، ملزم کے خلاف مختلف تھانوں میں 11 ایف آئی آر بھی درج ہیں۔ ملزم کے دیگر ساتھیوں کی گرفتاری کیلئے چھاپے مارے جا رہے ہیں، گرفتار ملزم کو برآمد شدہ ہینڈ گرنیڈ سمیت مزید قانونی کارروائی کے لیے پولیس کے حوالے کر دیا گیا۔