اسلام ٹائمز۔ وزیر داخلہ بلوچستان ضیاء لانگو نے کہا کہ بلوچستان کے مختلف اضلاع میں لیویز اور پولیس چیک پوسٹوں پر بھتہ لینے والوں کے خلاف گھیرا تنگ کر دیا گیا ہے۔ صوبائی وزیر ضیاء لانگو نے اپنے ویڈیو پیغام میں کہا کہ عوام بھتہ خوری کرنے والے اہلکاروں کی ویڈیوز بنا کر نشاندہی کریں۔ عوام کا تعاون ہوگا تو بھتہ خوری میں ملوث کالی بھیڑوں کا خاتمہ کردیں گے۔ بھتہ خوری کے خلاف کریک ڈاؤن میں عوام کا تعاون انتہائی ضروری ہے۔ انہوں نے مزید کہا کہ وزیراعلیٰ بلوچستان کی ہدایت ہے کہ بھتہ خوری میں ملوث افراد کے ساتھ کوئی رعایت نہ برتی جائے۔ لیویز اور پولیس کی چیک پوسٹوں پر اب بھتہ خوری نہیں چلے گی۔ گھناؤنے عمل میں ملوث انتظامی افسران کے خلاف بھی کارروائی عمل میں لائی جائے گی۔ وزیر داخلہ نے مزید کہا کہ ہم عوام کے نمائندے ہیں۔ ان کے مفادات کا تحفظ ہمارا فرض ہے۔