جماعت اسلامی کے الیکٹرک کے کراچی دشمن اقدامات پر خاموش نہیں بیٹھے گی، منعم ظفر

اسلام ٹائمز۔ جماعت اسلامی کراچی کے عبوری امیر منعم ظفر خان نے صوبائی وزیر توانائی کی زیر صدارت گزشتہ روز سندھ اسمبلی میں پارلیمانی لیڈرز اور ارکان اسمبلی کے ہمراہ کے الیکٹرک اور پاور ڈویژن کے حکام کے ایک اجلاس میں جماعت اسلامی کے رکن سندھ اسمبلی محمد فاروق کی جانب سے شہر میں بدترین لوڈشیڈنگ ختم کرنے کے مطالبے اور کے الیکٹرک کی نااہلی و ناقص کارکاردگی کو بے نقاب کرنے پر کے الیکٹرک کے سی ای او مونس علوی کی طرف سے جماعت اسلامی کے الیکٹرک کی دشمن ہے کے ریمارکس پر اپنے شدید ردعمل کا اظہار کرتے ہوئے کہا کہ جماعت اسلامی اہل کراچی کے مفادات کے تحفظ اور ان کے حقوق کی جدوجہد کررہی ہے، کے الیکٹرک نے اہل کراچی کے مفادات کے خلاف اپنا رویہ اور پالیسی ترک نہ کی اور شہریوں کو بدترین لوڈشیڈنگ اور اووربلنگ کے عذاب میں مبتلا رکھا تو جماعت اسلامی بھی کراچی کے عوام کی حقیقی نمائندگی کا حق ادا کرتی رہے گی۔

ان کا کہنا تھا کہ کے الیکٹرک انتظامیہ اور اس کے سرپرست یاد رکھیں کہ جماعت اسلامی کراچی کے دشمن اور عوام دشمن اقدامات اور پالیسیوں پر ہر گز خاموش نہیں بیٹھے گی، جماعت اسلامی کا شروع سے مطالبہ رہا ہے کہ کے الیکٹرک کا لائسنس منسوخ کرکے اسے قومی تحویل میں لیا جائے، اس کا فارنزک آڈٹ کیا جائے اور کے الیکٹرک کے ذمے کلا بیک کی مد میں اہل کراچی کے واجب الادا اربوں روپے واپس دلوائے جائیں اور کے الیکٹرک کو اس بات کا پابند کیا جائے کہ وہ سوئی سدرن گیس کے 177 ارب روپے کے واجبات ادا کرے۔ منعم ظفر خان نے مزید کہا کہ ہمارے رکن سندھ اسمبلی نے مذکورہ اجلاس اور اس سے قبل سندھ اسمبلی کے فورم پر بھی کے الیکٹرک کی بدعنوانیوں اور نااہلی و ناقص کارکردگی کو بے نقاب کرتے ہوئے اہل کراچی کا مقدمہ لڑا ہے اور آئندہ بھی لڑیں گے۔

انہوں نے کہا کہ کے الیکٹرک انتظامیہ ہٹ دھرمی پر اتر آئی ہے، AT&C کی بنیاد پر نیپرا کی جانب سے لگائے گئے جرمانے کو ادا کرنے پر تو تیار ہے لیکن انتہائی بے شرمی اور ڈھٹائی کا مظاہرہ کرتے ہوئے لوڈشیڈنگ ختم نہ کرنے کا اعلان کررہی ہے۔ منعم ظفر خان نے کہاکہ مرکزی و صوبائی حکومت اور نیپرا کی بھی ذمہ داری ہے کہ وہ کراچی کے عوام کے مفادات کا تحفظ اور مسائل حل کرے اور کے الیکٹرک کو ٹیرف میں 10.69 روپے فی یونٹ اضافے کی ہرگز اجازت نہ دے، جماعت اسلامی کے الیکٹرک ٹیرف میں ظالمانے اضافے کو کسی صورت قبول نہیں کرے گی، نیپرا کے فورم سمیت ہر سطح پر احتجاج اور مزاحمت کرے گی، جماعت اسلامی ماضی میں بھی اہل کراچی کے ساتھ تھی اور آج بھی کراچی کے عوام کے ساتھ کھڑی ہے۔ منعم ظفر خان نے مزید کہا کہ اگر کے الیکٹرک کے خلاف پہلے ہی کارروائی کی جاتی، اسے نجکاری معاہدے پر عمل درآمد کا پابند کیا جاتا تو شہر میں بجلی کے بحران اور مہنگی بجلی کی موجودہ بدترین صورتحال نہ ہوتی۔