چینی شہریوں پر حملے میں افغان سرزمین استعمال ہوئی، محسن نقوی

اسلام ٹائمز۔ وفاقی وزیر داخلہ محسن نقوی نے کہا کہ چینی شہریوں پر حملے میں افغان سرزمین استعمال ہوئی، افغان سرزمین استعمال ہونے پر ہمیں سخت تشویش ہے۔ وفاقی وزیر داخلہ محسن نقوی اور دیگر نے  لاہور میں پریس کانفرنس میں کہا کہ چین کیساتھ ہمارے تعلقات بہت اہمیت کے حامل ہیں، چین نے ہمیشہ پاکستان کا ساتھ دیا، چینی شہریوں پر پلان کرکے حملہ کیا گیا، پاکستان نے افغان عبوری حکومت کیساتھ دہشت گردی کا معاملہ اٹھایا ہے۔ محسن نقوی نے مزید کہا کہ ابھی تک افغان عبوری حکومت سے اچھے نتائج نہیں آ رہے، ہم نے سرحد کی سکیورٹی کو بھی بڑھایا ہے، ہمیں پتہ ہے کون سی طاقتیں چین اور پاکستان کے تعلقات خراب کرنا چاہتی ہیں، دہشت گرد افغان عبوری حکومت کی کمزوری کا فائدہ اٹھا رہے ہیں۔
 
وزیر داخلہ نے کہا کہ سرحدی علاقوں میں ٹی ٹی پی جیسے دہشت گردوں کو سپورٹ فراہم کی جا رہی ہے، اس حوالے سے ہمارے پاس بہت سے شواہد موجود ہیں، بشام حملے میں پانچ چینی قتل اور ایک پاکستانی شہری شہید ہوا تھا۔ محسن نقوی نے کہا کہ چینی شہریوں کی سکیورٹی کیلئے نئے ایس او پیز بنائے ہیں، چینی شہریوں کی سکیورٹی کیلئے ہرممکن اقدامات کر رہے ہیں، اگلے مہینے وزیراعظم چین کا دورہ کریں گے۔

وفاقی وزیر داخلہ نے کہا کہ چینی شہریوں کی حفاظت کرنا ہماری ذمہ داری ہے، بشام حملہ ٹی ٹی پی نے کیا، جس کے تمام شواہد موجود ہیں، 26 مارچ کو چینی انجینئرز کا قافلہ داسو جا رہا تھا، قافلہ داسو کی طرف رواں دواں تھا کہ کار میں بیٹھے خودکش بمبار نے خود کو اڑا لیا۔ انہوں نے بتایا کہ دھماکہ خیزمواد کار کے دروازوں میں فکس کیا گیا تھا، چینی انجیئنرز کی بس دھماکے بعد 150 فٹ نالے میں گرگئی تھی، حملے میں استعمال ہونیوالی سلور کار کا ماڈل 2006ء تھا۔