وہ دن دور نہیں جب مودی کہیں گے کہ میری پوجا کرو، اسد الدین اویسی

اسلام ٹائمز۔ آل انڈیا مجلس اتحاد المسلمین کے سربراہ اسد الدین اویسی نے بھی پارلیمانی انتخابات 2024ء کے ساتویں اور آخری مرحلے کے لئے بہار میں اپنی پوری طاقت جھونک دی۔ اس دوران اسد الدین اویسی نے پالی گنج میں بھارتی وزیراعظم نریندر مودی کو نشانہ بنایا۔ اس دوران نریندر مودی پر طنز کرتے ہوئے انہوں نے کہا کہ 2014ء میں جب مودی آئے تھے تو انہوں نے کہا تھا کہ اچھے دن لائیں گے، ہر ایک کے بینک اکاؤنٹ میں 15 لاکھ روپے آئیں گے اور ہر سال 2 کروڑ نوکریاں دی جائیں گی۔ پالی گنج میں جلسہ عام سے خطاب کرتے ہوئے اسد الدین اویسی نے کہا کہ جب 2019ء شروع ہوا تو مودی نے کہا کہ میں آپ کا چوکیدار ہوں، دوسری طرف جب الیکشن ہوئے تو انہوں نے کہا کہ میں آپ کا خادم ہوں۔ اویسی نے کہا کہ اب جب 2024ء آیا ہے تو وہ کہہ رہے ہیں کہ میں بایولوجیکلی طور پر پیدا نہیں ہوا تھا۔ انہوں نے کہا کہ اب مودی کہتے ہیں کہ مجھے شکتی نے کسی مقصد کے لئے بنایا ہے۔

اسد الدین اویسی نے طنزیہ انداز میں کہا کہ وہ دن دور نہیں جب مودی کہیں گے، میں سب کچھ ہوں، صرف میری پوجا کرو۔ گزشتہ ہفتے اسد الدین اویسی نے کراکت پارلیمانی سیٹ پر انتخابی مہم کے دوران مودی پر تنقید کی۔ اویسی نے کہا کہ مودی نے ملک پر کوئی احسان نہیں کیا بلکہ ملک نے انہیں وزیر اعظم بنا کر ان پر احسان کیا ہے۔ کرکت میں جلسہ عام سے خطاب کرتے ہوئے بہار کے مسلمانوں کو یاد رکھنا چاہیئے کہ وہ نہ صرف ووٹ دے سکتے ہیں بلکہ ووٹ بھی مانگ سکتے ہیں۔ اگلے اسمبلی انتخابات میں ہم دکھائیں گے کہ بہار میں ایک مسلم وزیراعلٰی ہو سکتا ہے۔ انہوں نے کہا کہ بہار میں کرکت میں قالین بُنا جاتا ہے، لیکن جو لوگ آپ کو اقتدار کے لئے استعمال کرنا چاہتے ہیں ان کے لئے اسے بچھاتے نہ رہیں۔