جب تک میں زندہ ہوں بی جے پی کو ریزرویشن ختم نہیں کرنے دونگا، اروند کیجریوال

اسلام ٹائمز۔ پنجاب میں پارلیمانی انتخابات کے آخری مرحلے کی مہم زوروں پر جاری ہے۔ ادھر پنجاب کے ہوشیار پور میں جلسہ عام سے خطاب کرتے ہوئے دہلی کے وزیراعلٰی اروند کیجریوال نے ریزرویشن سمیت کئی مسائل پر بی جے پی حکومت پر تنقید کی۔ انہوں نے بی جے پی کے 400 پاس کے نعرے پر بھی سوال اٹھائے اور عوام سے عام آدمی پارٹی کے ہاتھ مضبوط کرنے کی اپیل کی۔ اروند کیجریوال نے کہا کہ جب تک میں زندہ ہوں انہیں ریزرویشن ختم نہیں کرنے دوں گا۔ انہوں نے عوام سے اپیل کرتے ہوئے کہا ’’آپ کا تعاون درکار ہے، میں ان سے لڑ رہا ہوں، میں ان کے ساتھ جدوجہد کر رہا ہوں‘‘۔ انہوں نے کہا کہ ہم کسی بھی حالت میں ریزرویشن کو روکنے کی اجازت نہیں دیں گے لیکن ہمیں آپ کے تعاون کی ضرورت ہے۔

انہوں نے کہا ’’اروند کیجریوال آپ کے تعاون کے بغیر کچھ نہیں کر سکتے‘‘۔ انہوں نے ہوشیار پور سے عام آدمی پارٹی کے امیدوار راج کمار چبیوال کو زیادہ سے زیادہ اکثریت سے جیتنے کی اپیل کی۔ دہلی کے وزیراعلٰی اروند کیجریوال نے یہ بھی کہا کہ پنجاب آمریت کے خلاف لڑے گا اور جیت جائے گا۔ انہوں نے مزید کہا کہ گزشتہ انتخابات میں جب میں انتخابی مہم چلانے آیا تھا تو میں نے کہا تھا کہ میں آپ کا بجلی کا بل صفر کر دوں گا، یہ میں نے دہلی میں کیا اور اب پنجاب میں بجلی کا بل بھی صفر ہے۔ انہوں نے کہا کہ دہلی میں گزشتہ 2 سالوں میں ہم نے عوام کو بہت زیادہ سہولیات فراہم کی ہیں، دہلی کے بعد اب ہم نے پنجاب میں بھی جادو دکھایا ہے، پنجاب میں 24 گھنٹے بجلی ہے لیکن بل نہیں ہے۔