اسلام ٹائمز۔ شہر قائد میں کسٹم انٹیلیجنس اور دیگر اداروں نے خفیہ اطلاع پر چھاپہ مار کر جعلی پٹرول اور ڈیزل بنانے والے گودام کو سیل کر دیا۔ تفصیلات کے مطابق کراچی کے ضلع کورنگی سیکٹر 50 سی میں کسٹم انٹیلی جنس اور دیگر اداروں نے خفیہ اطلاع پر ایک گودام پر چھاپہ مارا، جہاں جعلی پٹرول اور ڈیزل بنایا جاتا تھا۔ چھاپہ مار ٹیم نے بھاری مقدات میں جعلی پٹرول، ڈیزل اور الیفاٹک ہائیڈرو کاربن سالوینٹ برآمد کرکے گودام سیل کر دیا۔ چھاپہ مار ٹیم نے کارروائی میں 24 آئل ٹینکس سے 4 لاکھ 50 ہزار 561 لیٹر جعلی پٹرول اور ڈیزل برآمد کیا۔ گودام مالک نے چار سال سے لائسنس کی تجدید نہیں کرائی تھی، جبکہ الیفاٹک ہائیڈرو کاربن سالوینٹ کو پٹرول اور ڈیزل کی مقدار بڑھانے کیلئے استعمال کیا جاتا تھا۔