بھارت کا نو آبادیاتی منصوبہ مقبوضہ کشمیر کی مسلم شناخت کو مٹانے کی سازش ہے

اسلام ٹائمز۔ غیر قانونی طور پر بھارت کے زیر قبضہ جموں و کشمیر میں بھارت کا نو آبادیاتی منصوبہ ایک مذموم ایجنڈا ہے جس کا مقصد علاقے کی مسلم شناخت کو مٹانا ہے۔ کل جماعتی حریت کانفرنس کی قیادت کا کہنا ہے کہ مودی حکومت منظم طریقے سے مقبوضہ جموں و کشمیر میں آبادکاری کی راہ ہموار کر رہی ہے جو راشٹریہ سوائم سیوک سنگھ اور بھارتیہ جنتا پارٹی کے گٹھ جوڑ کا دیرینہ خواب ہے۔ حریت رہنمائوں نے سرینگر سے جاری ایک مشترکہ بیان میں کہا ہے کہ مقبوضہ جموں و کشمیر پر بھارت کا جابرانہ قبضہ اس وقت شروع ہوا جب 27 اکتوبر 1947ء کو اس کی فوجیں سرینگر میں اتریں اور تب سے بھارت نے مقبوضہ جموں و کشمیر کو اپنی کالونی سمجھ رکھا ہے۔ انہوں نے کہا کہ 5 اگست 2019ء کو مودی حکومت کے غیر قانونی اقدامات مقبوضہ جموں و کشمیر کو اپنی نوآبادی بنانے کی طرف ایک اور قدم تھا جس کا مقصد کشمیریوں کو بے گھر کرنا اور انہیں ان کی شناخت سے محروم کرنا تھا۔

اس مقصد کو حاصل کرنے کے لیے بھارتی حکومت مقبوضہ جموں و کشمیر کے مسلم اکثریتی تشخص کو ختم کرنے کے لیے وقتا فوقتا نئے قوانین متعارف کروا رہی ہے۔ بیان میں کہا گیا کہ بی جے پی کی حکومت نے اپنے مذموم منصوبے کے تحت 5 اگست 2019ء کے بعد غیر کشمیری ہندوئوں کو ڈومیسائل اور زمین کے مالکانہ حقوق دینے میں سہولت فراہم کرنے کے لیے بہت سے نئے قوانین متعارف کرائے۔ حریت رہنمائوں نے کہا کہ مودی حکومت اپنے نوآبادیاتی منصوبے کے حصے کے طور پر مقبوضہ جموں و کشمیر میں آبادی کا تناسب تبدیل کر رہی ہے۔ فسطائی مودی حکومت اسرائیلی ماڈل پر عمل کرتے ہوئے مقبوضہ جموں و کشمیر میں نوآبادیاتی منصوبے کو توسیع دینے کے لیے بھارتی کاروباری کمپنیوں اور ٹائیکونز کو استعمال کر رہی ہے۔

حریت رہنمائوں کا کہنا ہے کہ جائیدادوں کی غیر قانونی ضبطی اور مسماری مقبوضہ جموں و کشمیر میں آبادکاری کی منظم مہم کا حصہ ہے۔ انہوں نے کہا کہ مودی کا بنیادی مقصد مقبوضہ جموں و کشمیر کی مسلم شناخت کو ختم اور ہندو تہذیب کو مسلط کرنا ہے۔ علاقے میں بھارتی حکومت کے استعماری اقدامات اقوام متحدہ کی قراردادوں کی کھلی خلاف ورزی ہیں۔ عالمی برادری کو جاگ جانا چاہیے اور مقبوضہ جموں و کشمیر میں بھارت کے نوآبادیاتی منصوبے کا نوٹس لینا چاہیے اور انسانیت کے خلاف جرائم پر بھارت کو جوابدہ ٹھہرانا چاہیے۔