امید ہے کہ ایران و اردن کے مابین بات چیت نتیجہ خیز ہو گی، اردن کے ولیعہد

الحسین بن عبدالله الثانی نے کہا کہ اردن اور ایران کے درمیان تمام مسائل پر بات چیت جاری ہے اور ہمیں امید ہے کہ یہ بات چیت نتیجہ خیز ثابت ہو گی۔ تاہم ہماری او٘لین ترجیح ہے کہ اردن علاقائی جنگ کا میدان نہ بنے۔ انہوں نے علاقائی صورت حال کی وضاحت کرتے ہوئے کہا کہ مسئلہ فلسطین ہمارا مسئلہ ہے اور اس سلسلے میں ہمیں جتنی بھی سیاسی و اقتصادی قیمت چکانا پڑے ہم ادا کریں گے۔ ہم فلسطین کاز پر اپنی ذمے داریوں کو بخوبی انجام دے رہے ہیں۔الحسین بن عبدالله الثانی نے مزید کہا کہ میری پہلی ترجیح ملک کی سلامتی و استحکام کو برقرار رکھنا ہے کیونکہ ایک مضبوط اردن ہی فلسطین کا دفاع کر سکتا ہے اور فلسطینیوں کا سب سے بڑا حامی بن سکتا ہے۔ آخر میں اردنی ولی عہد نے کہا کہ آج ہماری توجہ کا مرکز غزہ کی پٹی ہے لیکن اسرائیل مغربی کنارے کی صورت حال خراب کر کے خطے کو جنگ میں جھونکنا چاہتا ہے۔