سرکاری افسران سیاسی معاملات سے دور رہیں، وزیراعلیٰ سرفراز بگٹی

اسلام ٹائمز۔ وزیراعلیٰ بلوچستان سرفراز بگٹی کا کہنا ہے کہ پولیس اور لیویز چیک پوسٹوں پر بھتہ میں ملوث افسران کیخلاف کارروائی کی جائے گی۔ انتظامی افسران کی کارکردگی کا جائزہ لینے کے لئے "کی پرفارمنس انڈیکیٹرز" پر عمل کریں گے۔ انہوں نے افسران کو ہدایت دی کہ وہ خود کو جانبدارانہ سیاسی معاملات سے دور رکھیں۔ ان خیالات کا اظہار انہوں نے صوبائی دارالحکومت کوئٹہ میں بلوچستان کی امن و امان سے متعلق اعلیٰ سطحی اجلاس سے گفتگو کرتے ہوئے کیا۔ اجلاس میں دہشت گردی میں شہید ہونے والے افراد کو معاوضے کی ادائیگی کی پیش رفت کا بھی جائزہ لیا گیا۔ سرفراز بگٹی نے اس موقع پر کہا کہ دہشت گردی کے قلع قمع اور بحالی امن کے لئے تمام سیکیورٹی ادارے باہمی رابطہ کاری سے مؤثر کارروائیوں کا تسلسل جاری رکھیں۔ دہشت گردوں اور ان کے معاونت کاروں کے خلاف بلاامتیاز کارروائی جاری رکھی جائے گی۔

وزیراعلیٰ سرفراز بگٹی کی محکمہ داخلہ کو ہدایت کی کہ شہداء کو قانون کے مطابق طے شدہ معاوضے کی ادائیگی کے لئے کارروائی تیز کی جائے۔ سنیپ چیکنگ کرکے شہری علاقوں میں جرائم کی روک تھام کو یقینی بنایا جائے۔ انہوں نے صوبے کے اعلیٰ حکام کو حکم دیتے ہوئے کہا کہ لیویز اور پوليس چیک پوسٹوں پر بھتہ خوری کی روک تھام یقینی بنائی جائے۔ ملوث افسران اور اہکاروں کے خلاف کارروائی ہوگی۔ تمام انتظامی افسران سروس ڈلیوری اور عوام کو ریلیف کی فراہمی کے لئے عملی اقدامات اٹھائیں۔ انہوں نے مزید کہا کہ تمام کمشنرز، ڈپٹی کمشنرز اور ضلعی پولیس افسران کی کانفرنس طلب کریں گے۔ افسران کو قانون پر عملدرآمد اور عوامی بہبود کا واضح روڑ میپ دیں گے۔ انتظامی افسران کی کارکردگی کا جائزہ لینے کے لئے "کی پرفارمنس انڈیکیٹرز" پر عمل کریں گے۔ ضلعی افسران غیر جانبداری سے قانون کے نفاذ کو یقینی بنائیں۔ سرفراز بگٹی نے سرکاری افسران کو ہدایت دیتے ہوئے کہا کہ افسران خود کو جانبدارانہ سیاسی معاملات سے دور رکھیں، تمام افراد کے لئے یکساں قانون و سلوک ضروری ہے۔