شہید ابراہیم رئیسی ایران و امت مسلمہ کی خدمت میں مسلسل مصروف عمل رہے، مہدی مہدوی پور

اسلام ٹائمز۔ اسلامی جمہوریہ ایران کے صدر سید ابراہیم رئیسی، وزیر خارجہ حسین امیر عبداللہیان اور ہیلی کاپٹر سانحہ میں شہید ہونے والے ان کے رفقاء کی یاد میں آل انڈیا شیعہ کونسل، اہل بیت کونسل انڈیا اور علماء دہلی کی جانب سے مجلس سوم اور جلسہ تعزیت میں ہندوستان میں رہبر انقلاب اسلامی آیت اللہ خامنہ ای کے نمائندے حجۃ الاسلام و المسلمین آقای مہدی مہدوی پور نے اپنی تقریر میں کہا کہ صدر ایران شہید سید ابراہیم رئیسی اور وزیر خارجہ ڈاکٹر حسین امیر عبداللہیان نے مملکت ایران اور امت مسلمہ بالخصوص فلسطین اور غزہ کے مظلوموں کی حمایت میں دن رات انتھک محنتیں کی ہیں اور یہی وجہ ہے اس سانحہ پر پوری امت مسلمہ غمزدہ ہے۔ اس دوران مولانا شیخ ممتاز علی امام جمعہ امامیہ ہال نے کہا کہ اس سانحہ سے دور دور تک رنج وغم کی لہر دوڑ گئی اور ہندوستان سمیت دنیا بھر میں ان شہداء کے لئے تعزیت کا سلسلہ جاری ہے۔ مولانا محسن تقوی امام جمعہ شیعہ جامع مسجد کشمیری گیٹ نے اس موقع پر کہا کہ شہید ابراہیم رئیسی اور ان کے رفقاء نے جو کردار امت اسلام کی فلاح و بہبود اور فلسطینی مظلوموں کی حمایت میں ادا کیا ہے وہ مثالی ہے۔

مولانا سید شمشاد احمد رضوی نے اپنی تقریر میں کہا کہ آپ دیکھ رہے ہیں کہ کچھ لوگ اس سانحہ پر خوشی منا رہے ہیں یہ یہ ان لوگوں کی مانند ہیں جو قتل فرزند رسول الثقلین امام حسین پر خوش تھے انہوں نے شہداء کے لئے منظوم نذرانہ عقیدت بھی پیش کیا۔ مولانا محمد رضا غروی صدر اہل بیت کونسل نے کہا کہ ایرانی وزیر خارجہ حسین امیر عبداللہیان شجاعت و ہمت اور اخلاق کا پیکر تھے۔ ناظمِ جلسہ مولانا جنان اصغر مولائی صدر آل انڈیا شیعہ کونسل نے رہبر انقلاب اسلامی آیت اللہ خامنہ ای کی قوت قلب اور سلامتی کے لئے دعا کراتے ہوئے کہا کہ شہید قاسم سلیمانی، شہید محسن فخری زادہ، شہید جنرل زاھدی کی شہادت کے بعد رہبر معظم کیلئے ایسے عظیم ساتھیوں کو کھو دینا بڑا صدمہ ہے۔ شاعر اھل بیت حکیم ضرغام نے شہداء کے لئے منظوم نذرانہ عقیدت پیش کیا۔ کانفرنس میں کثیر تعداد میں علماء کرام اور مومنین نے دہلی کے مختلف علاقوں سے مجلس میں شرکت فرمائی۔