پاکستان کے مختلف شہروں میں زلزلہ کے شدید جھٹکے، 9 افراد جاں بحق

اسلام ٹائمز۔ کراچی، لاہور، پشاور اور کوئٹہ سمیت ملک کے مختلف حصوں میں زلزلے کے شدید جھٹکے محسوس کئے گئے ہیں، جس کے نتیجے میں ابتدائی اطلاعات کے مطابق پاک ایران سرحدی علاقے ماش خیل میں 9 افراد جاں بحق ہوگئے، جبکہ کراچی کے علاقے لیاری اور کھارا در میں دو عمارتوں کے کچھ حصے گر گئے، جس سے پانچ افراد زخمی ہوگئے۔ زلزلے کا مرکز پاک ایران سرحد تھا اور اس کی شدت سات اعشاریہ آٹھ ریکارڈ کی گئی۔ زلزلہ کے باعث ہر طرف خوف و ہراس پھیل گیا۔ لوگ گھروں سے باہر نکل آئے۔ قلات، چمن، پشین، زیارت، ہرنائی، سبی، بولان، خاران، مستونگ میں بھی زلزلے کے جھٹکے محسوس کیے گئے۔ سندھ کے علاقوں میں کراچی کے علاوہ حیدر آباد، بدین، لاڑکانہ، نواب شاہ، قمبر شہداد کوٹ اور تھر پارکر میں بھی زلزلے کے جھٹکے محسوس کیے گئے۔
 
زلزلے کی لہر پنجاب میں رحیم یار خان، خانیوال، ملتان، گجرات، سیالکوٹ سمیت مختلف شہروں میں محسوس کی گئی۔ امریکی جیولوجیکل سروے کے مطابق زلزلے کا مرکز پاک ایران سرحد پر بیاسی کلو میٹر گہرائی میں تھا اور زلزلے کی شدت سات اعشاریہ آٹھ ریکارڈ کی گئی جبکہ ایرانی زلزلہ پیما سنٹر کے مطابق زلزلے کا مرکز پاکستانی سرحد سے 48 کلومیٹر دور ایرانی شہر سراوان تھا۔ زلزلے سے بلوچستان کے ضلع واشک علاقے ماش خیل میں نو افراد جاں بحق ہوئے، جبکہ سو سے زائد افراد زخمی ہوئے۔ علاوہ ازیں ایران، ہندوستان، سعودی عرب، کویت، افغانستان اور انڈونیشیاء میں بھی زلزلے کے جھٹکے محسوس کئے گئے۔