شاہ زین بگٹی کے قافلے کا دھرنا جاری، ٹریفک کیلئے روڈ کھولنے سے انکار

اسلام ٹائمز۔ جمہوری وطن پارٹی کے رہنما شاہ زین بگٹی اور ان کے ساتھیوں کا انڈس ہائی وے پر دھرنا جاری ہے۔ اپوزیشن لیڈر خورشید شاہ کی یقین دہانی کے باوجود سڑک ٹریفک کے لیے نہیں کھولی گئی۔ قومی اسمبلی میں قائد حزب اختلاف سید خورشید شاہ کی یقین دہانی کے باوجود شاہ زین بگٹی نے انڈس ہائی وے کو نہیں کھولا۔ سید خورشید شاہ نے شام کو انڈس ہائی وے پر ڈیرہ موڑ پر شاہ زین بگٹی سے ملاقات کی، جس میں شاہ زین کو یقین دہانی کرائی گئی کہ چھ روز بعد وہ انہیں لے کر ڈیرہ بگٹی جائیں گے تاہم اس دوران وہ اپنا احتجاج جاری رکھ سکتے ہیں لیکن سڑک کو ٹریفک کے لیے کھول دیں۔ سید خورشید شاہ نے شاہ زین کو بتایا کہ حکومت سندھ کی طرف سے وہ ان کے کارواں کے لیے خیمہ بستی کا انتظام کریں گے۔ خورشید شاہ نے کہا کہ شاہ زین سندھ میں ان کے مہمان ہیں وہ ان کو یہاں سے زبردستی نہیں اٹھائیں گے تاہم وہ عوام کی سہولت کے لئے ٹریفک کے لئے روڈ کو کھول دیں۔ خورشید شاہ کے جانے کے بعد شاہ زین بگٹی نے سڑک کھولنے سے انکار کرتے ہوئے کہا کہ جب تک خیمہ بستی انتظام نہیں ہو جاتا اس وقت تک روڈ کو ٹریفک کے لیے نہیں کھولا جائے گا۔