شیعہ علماء کونسل بھی عوامی ایکشن کمیٹی میں شامل اہم جماعت ہے، ترجمان

اسلام ٹائمز۔ اسلامی تحریک و شیعہ علماء کونسل پاکستان کے صوبائی ترجمان نے صوبائی سیکرٹریٹ گلگت سے جاری اپنے ایک بیان میں کہا ہے کہ شیعہ علماء کونسل بھی گلگت بلتستان کی 16 سیاسی، قوم پرست اور مذہبی جماعتوں کے اتحاد "عوامی ایکشن کمیٹی" میں شامل اہم جماعت ہے اور ایکشن کمیٹی کے متعدد اجلاس شیعہ علماء کونسل گلگت کے صوبائی سیکرٹریٹ میں منعقد ہو چکے ہیں جبکہ ایس یو سی ضلع گلگت کے صدر مولانا شیخ شہادت حسین ساجدی عوامی ایکشن کمیٹی کی مرکزی ایگزیکٹو باڈی کے رکن بھی ہیں۔ انہوں نے بعض عناصر کی جانب سے شیعہ علماء کونسل کی عوامی ایکشن کمیٹی سے اظہار لاتعلقی کی خبروں کی سختی کیساتھ تردید کرتے ہوئے واضح کیا کہ ایس یو سی عوامی ایکشن کمیٹی کے چارٹر آف ڈیمانڈ کی بھرپور حمایت کرتی ہے اور اسکردو اور گلگت کے دھرنوں میں شیعہ علماء کونسل کے راہنماوں نے خصوصی شرکت اور خطاب بھی کیا ہے۔