قبائلی علاقوں میں لاکھوں بچے پولیو قطرے پینے سے محروم

اسلام ٹائمز۔ پاکستان کے قبائلی علاقوں میں پیر کو پولیو مہم کا آغاز کیا گیا ہے تاہم حکام نے کہا ہے کہ سیکورٹی خدشات کے باعث 370،000 بچے تمام تر کوششوں کے باوجود پولیو ویکسین پینے سے محروم رہیں گے۔ مئی کے اوئل میں عالمی ادارہ صحت (ڈبلیو ایچ او) نے پاکستان میں پولیو کے نئے کیسز کے منظر عام پر آنے کے بعد عالمی سطح پر پبلک ہیلتھ ایمرجنسی کا اعلان کیا تھا اور اس میں پاکستان بھی شامل ہے۔ افغان سرحد کے ساتھ پاکستان کے 7 نیم خود مختار قبائلی علاقے ملک کے پولیو کیسز کے مراکز ہیں اور حکومت نے ان علاقوں کے رہائشیوں کے لئے پولیو ویکسین کو یقینی بنانے کے لئے چیک پوائنٹس قائم کی ہیں۔ پشاور میں ایک سینیئر عہدیدار نے بتایا کہ 3 روزہ پولیو مہم 4 قبائلی علاقوں میں پیر سے شروع کی گئی ہے۔ جس میں 620،000 بچوں کو پولیو کے قطرے پلائے جائیں گے۔ ایک عہدیدار نے بتایا کہ پولیو مہم کیلئے منتخب کئے گئے ۳ یا ۴ علاقوں میں عسکریت پسندی اور پولیو کی مخالفت کی وجہ سے قطرے نہیں پلائے جاسکیں گے۔ واضح رہے کہ پاکستان میں دہشتگردی اور عسکریت پسندی پولیو کے خاتمے میں سب سے بڑی رکاوٹ ہے۔