ایم ڈبلیو ایم کو درپیش چیلنج

تحریر: سید تنویر حیدر

حالیہ الیکش میں جس طرح باقاعدہ پیمانے پر بے قاعدگیاں کی گئیں، وہ پاکستان کے انتخابات کی تاریخ میں اپنی مثال آپ تو ہیں ہی، لیکن اس کے بعد لمحہء موجود میں جس طریقے سے اقتدار کی بندر بانٹ کا سلسلہ جاری و ساری ہے، وہ بھی عالم مثال میں اپنی ایک الگ مثال رکھتا ہے۔ ایوان اقتدار تک پہنچنے کے لیے اب ہمارے سامنے ایسے ایسے فارمولے گردش کر رہے ہیں، جنہوں نے بڑے بڑے حساب دانوں کے سر چکرا دیئے ہیں۔ کل تک مختلف ٹی وی چینلوں کے سٹوڈیوز میں بیٹھ کر جو ستارہ شناس آسمان کے ستاروں کا حال بتاتے تھے، آج خود افق کی اتھاہ گہرائی میں کہیں غروب ہوچکے ہیں۔

لیلیٰء اقتدار تک پہنچنے کے انہی فارمولوں میں سے ایک فارمولا یہ ہے کہ اکثریتی ووٹ لینے والے پی ٹی آئی کے حمائتی اراکین خود کو ”مجلس وحدت مسلمین“ میں ضم کر دیں۔ اگر عملی طور پر یوں ہو جاتا ہے تو پھر یہ ایم ڈبلیو ایم کے شانوں پر اچانک پڑنے والا ایسا بارِگراں ہوگا، جس کے لیے شاید وہ پہلے سے تیار نہیں ہے۔ اس وقت تک پی ٹی آئی کے ساتھ، بقول اس کے، جو ناانصافیاں کی گئی ہیں، ان کی ایک طویل داستان ہے۔ ملک کی اکثریتی پارٹی جب مجلس وحدت مسلمین کے پرچم تلے آئے گی تو پھر سیاسی اور غیر سیاسی میدان میں پی ٹی آئی کی جنگ ایم ڈبلیو ایم کی جنگ بن جائے گی۔

ایم ڈبلیو ایم جس نے ببانگ دہل خون کے آخری قطرے تک عمران خان کا ساتھ دینے کا اعلان کیا ہے، اب اس کے سامنے ایک ایسا ٹھاٹھیں مارتا ہوا سمندر ہے، جس کا سینہ چیر کر اسے پی ٹی آئی کی کشتی کو ساحل مقصود تک پہنچانا ہے۔ اس بحر ظلمات میں گھوڑے دوڑانے کے لیے ضروری ہے کہ اب مجلس وحدت وہ کام کرے، جو بوجوہ اب تک اس سے نہیں ہوسکا اور جو اس کی پہلی ترجیح ہونی چاہیئے تھی، یعنی اپنی جماعت کو مضبوط بنائے۔ لوگوں سے روابط بڑھائے، ہر شعبہء زندگی کے اہم افراد پر مشتمل ایک تھنک ٹینک وجود میں لائے۔ ایم ڈبلیو ایم کو چاہیئے کہ ملت کے وہ افراد جو ان سے بعض امور پر اختلاف رکھتے ہیں، ان کی طرف ہاتھ بڑھائے وغیرہ وغیرہ۔

ایسے میں جبکہ پی ٹی آئی بھی اپنے مفاد کے لیے خود کو ایم ڈبلیو ایم میں ضم کر رہی ہے تو کیا یہ ممکن نہیں کہ باقی شیعہ جماعتیں اگر قومی مفاد میں اپنے وجود کو مجلس وحدت میں ضم نہیں کرسکتیں تو کم سے کم مجلس کے پہلو سے اپنا پہلو ملائے ہوئے نظر آئیں۔؟ یاد رہے کہ جس قسم کا محاذ اب مجلس وحدت کے سامنے کھلنے جا رہا ہے، وہ صرف سوشل میڈیا تک موجود نہیں ہے بلکہ اس کا دائرہ کار نہایت وسیع ہے، ہماری دعا ہے کہ خدا ایم ڈبلیو ایم کو اس میدان میں سرخرو کرے۔