چلاس بس حادثہ، اموات 20 ہو گئیں، گلگت اور چلاس کے ہسپتالوں میں ایمرجنسی نافذ

اسلام ٹائمز۔ چلاس بس حادثہ میں جاں بحق ہونے والوں کی تعداد 20 ہو گئی جبکہ 21 افراد زخمی ہیں۔ ضلع دیامر کے علاقے گونر فارم کے قریب یشوکھل داس کے قریب آج صبح ساڑھے 5 بجے خوفناک بس حادثہ پیش آیا جس کے نتیجے میں 20 قیمتی جانیں ضائع ہوئیں اور 21 زخمی ہو گئے۔ وزیر اعلیٰ گلگت بلتستان کے ترجمان فیض اللہ فراق کے مطابق مارکوپولو کمپنی کی جانب سے چلائی جانے والی بس، جس کا رجسٹریشن نمبر LES 8831 تھا، صبح تقریباً 5 بجے یشوکھل کے قریب گہری کھائی میں گر گئی۔ مسافروں کا تعلق گلگت بلتستان کے مختلف اضلاع اور دیگر صوبوں سے تھا جن میں سکردو، گلگت، نگر اور ہنزہ کے علاوہ خیبر پختونخواہ، آزاد جموں و کشمیر اور پنجاب کے مختلف علاقے شامل ہیں۔