انسانیت کے قاتل دہشت گرد کسی رعایت کے مستحق نہیں، طاہرالقادری

اسلام ٹائمز۔ شیخ الاسلام ڈاکٹر طاہر القادری نے پشاور میں بم دھماکے کی شدید ترین مذمت کرتے ہوئے کہا ہے کہ انسانیت کے قاتل کسی رعائت کے مستحق نہیں یہ اسلام اور پاکستان کے کھلے دشمن ہیں، ایسے عناصر انسانیت کے ماتھے پر بدنما داغ ہیں اور ان کا اسلام سے کوئی تعلق نہیں۔ مرکزی سیکرٹریٹ لاہور سے جاری بیان میں انہوں نے دہشت گردی اور ٹارگٹ کلنگ کی بدترین لہر پر شدید تشویش کا اظہار کیا اور کہا کہ اس ناسور کے علاج کیلئے فکری، علمی اور عملی کام کرنے کی ضرورت ہے۔

علامہ طاہر القادری نے کہا کہ امن سے محبت رکھنے والوں کو دہشت گردی کے خلاف متحرک ہونا ہو گا، حکومت سطحی اقدامات کی بجائے دہشت گردی کے خلاف ٹھوس اور انتہائی سخت پالیسی بنائے اور مصلحتوں سے تائب ہو کر انسان نما درندوں کا سر کچل دے جو آئے روز انسانی خون سے ہولی کھیلتے ہیں۔ ڈاکٹر طاہر القادری نے کہا کہ دہشت گردانہ کارروائیوں کا تسلسل ملکی معیشت اور سلامتی دونوں کیلئے خطرناک ہے اس لئے اس کے تسلسل کو ہر صورت روکنا ہو گا۔

انہوں نے کہا کہ افسوسناک صورت حال یہ ہے کہ عالمی سطح پر پاکستان غیرمحفوظ ریاست کے طور پر جانا جاتا ہے جو اسکی معیشت کیلئے سب سے بڑا خطرہ ہے، بیرونی سرمایہ کار پاکستان آنے سے خوف کھاتے ہیں ،اس لئے حکومت انتہائی سنجیدہ اور ٹھوس اقدامات کرے۔ انہوں نے پشاور بم دھماکے میں جاں بحق ہونے والوں کی مغفرت اور زخمیوں کی جلد صحت یابی کیلئے دعا کی اور لواحقین سے اظہار ہمدردی کیا ہے۔