دہشتگردی کے پے در پے واقعات کے پیچھے شیطانی تثلیت امریکہ، بھارت اور اسرائیل کا خفیہ ہاتھ ہے، لیاقت بلوچ

اسلام ٹائمز۔ سیکرٹری جنرل جماعت اسلامی پاکستان لیاقت بلوچ نے کہا ہے کہ جماعت اسلامی آئندہ انتخابات میں اپنے کلمہ طیبہ والے پرچم اور ترازو کے انتخابی نشان پر حصہ لے گی، تاہم سیاسی جماعتوں کے ساتھ سیٹ ایڈجسٹمنٹ ہو گی۔ پیپلز پارٹی اور اس کے اتحادی قومی مجرم ثابت ہوئے ہیں۔ روٹی کپڑا مکان کا نعرہ پٹ چکا ہے۔ عوام آئندہ انتخابات میں نظریہ پاکستان و اسلام کی داعی اور ملک کو اسلامی فلاحی ترقی کی حامل جماعت اسلامی کو کامیابی دلوائیں۔ ملک میں دہشتگردی کے پے در پے واقعات کے پیچھے شیطانی تثلیت امریکہ بھارت اور اسرائیل کا خفیہ ہاتھ ہے۔ کشمیر پاکستان کی شہ رگ ہے اور ہم کشمیریوں کے پشتیبان ہیں۔ ان خیالات کا اظہار انہوں نے شباب ملی لاہور کے زیر اہتمام یکجہتی کشمیر ریلی کے شرکاء اور میڈیا کے نمائندوں سے گفتگو کرتے ہوئے کیا۔ اس موقع پر شباب ملی لاہور کے صدر عابد میر، احمد سلمان بلوچ و دیگر کارکنان بھی موجود تھے۔

لیاقت بلوچ نے کہا کہ پیپلز پارٹی کی حکومت نے اپنے پانچ سالہ دور اقتدار میں ملکی وسائل کو بے دردی سے لوٹا ہے۔ کرپشن کا فروغ اس حکومت کے ماتھے پر کلنک کے ٹیکے کی مانند پوری قوم کو دکھائی دے رہا ہے۔ پیپلز پارٹی اور اس کے اتحادیوں کی وجہ سے ملک سے خیر و برکت ہی اٹھ چکی ہے۔ انہوں نے کہا کہ بھارت نے مقبوضہ کشمیر پر غاصبانہ قبضہ کر رکھا ہے اس کی فوج کشمیریوں پر بے پناہ مظالم کر رہی ہے جبکہ بھارت پاکستان کے نخلستان کو ریگستان بنانا چاہتا ہے۔ لائن آف کنٹرول پر بھارتی فوج نے غیر اعلانیہ جنگ شروع کر رکھی ہے اور وہ ہمارے فوجی جوانوں کو شہید کر رہی ہے دوسری جانب قومی غیرت و حمیت سے عاری ہمارے حکمران اسے موسٹ فیورٹ نیشن کا درجہ ینے کے لیے ہلکان ہو رہے ہیں۔ پاکستان کے عوام بھارت کو ایم ایف این کادرجہ دینے کے فیصلے کو مسترد کرتے ہیں، حکومت بھی اس سے باز رہے۔