اسلام ٹائمز۔ اسپیکر سندھ اسمبلی آغا سراج درانی نے کہا ہے کہ تحریک انصاف کے جلسے سے پیپلز پارٹی کو کوئی گھبراہٹ نہیں، سندھ کے عوام کی سب سے زیادہ خدمت پیپلز پارٹی نے کی ہے۔ میڈیا سے گفتگو میں انہوں نے کہا کہ ہمارے مخالف جلسہ کرنا چاہتے ہیں، ضرور کریں ہمیں کوئی اعتراض نہیں۔ آغا سراج درانی نے کہا کہ ارباب غلام رحیم نااہل آدمی ہیں، اسمبلی میں نہیں آتے، اگر چاہیں تو ارباب غلام رحیم کو اسمبلی سے ہٹاسکتے ہیں تاہم ایسا نہیں کریں گے، جو اپنے علاقے کو وقت نہیں دیتا اسے اسمبلی میں رہنے نہیں دینا چاہیئے۔ سراج درانی نے کہا کہ تحریک انصاف سندھی عوام کو کیا دے سکتی ہے۔ پی ٹی آئی لاڑکانہ میں جلسہ کر لے اسے اپنی حیثیت کا پتہ چل جائے گا۔